師情草意：攝‧太帥
熟識我嘅朋友，必定知道我係一個菲林攝影嘅超級發燒友。講到攝影，不得不提我生命中兩位舉足輕重嘅男士。第一位，就係當我仲係黃毛丫頭嘅時候，畀部單反菲林相機我玩嘅家父，因為佢，我有機會進入攝影嘅世界。另一位，就係我師父梁天養（John T. Y. Leung）先生，由於佢凡事都係無師自通，同我不單亦師亦友，教學方法亦異於常人，佢從來唔會話我知點樣影相先至會靚，反而成日教我，菲林攝影就係光學同藝術嘅結合，科學得嚟應不失感性，因此攝影者嘅觀察係凌駕於一切所謂嘅「教規」。如果張相影唔出一個感覺（Feel）去感動人，就算作品完全符合所謂嘅「攝影規則」，都算不上係佳作。
其實師父對我嘅啟蒙，並非只令我同Bonita喺2017年贏出人生第一個國際攝影大賽，同時間，佢亦令我對西藥草世界嘅探索，進入另一個層次。對西草藥師嚟講，細緻而具有耐心嘅觀察力亦係處於榜首嘅重要能力，而呢個能力係必需從多角度及兩個大範疇，持續進行。第一個範疇，就係藥草方面，傳統嘅西草藥師不單會對自家種植嘅藥草細心觀察，並記錄當中可能因氣候或土壤改變所帶來嘅變化，以微調方劑配備病人服用，與此同時，亦會對野生藥草，作入微嘅觀察，從中了解藥草對應癥狀嘅可能性，再加以利用。可惜，現在可能由於網路上資訊嘅便利及城市化嘅發展，好多西草藥師都多較注重一些已知嘅資訊，而減少對藥草嘅細心而全面嘅觀察。菲林攝影，基於菲林片幅嘅限制，講求精準及細緻嘅觀察，對我研究西藥草有莫大嘅裨益。
第二個範疇，當然就係人！現在嘅西草藥師，好多時只着重書本及課堂所教嘅東西，喺應診諮詢時，只會對住既定程序（protocol）嚟做，以及依賴病者嘅口述情況，欠缺對病者嘅細心觀察。需知道大多數病者並無受過相關醫護訓練，加上受着不同癥狀嘅困擾，好多時會忽略一啲看似微不足道嘅癥狀，例如間歇性持續但又不嚴重嘅痛症。如果西草藥師沒有留意呢啲「細節」，好容易會斷錯症，令到病者得唔到適當治療。菲林攝影着重對事物以「真我本色」作具層次性嘅描繪，喺呢方面令我對「細節」嘅敏感度，增加不少。
就此，我除咗感謝對我苦心栽培嘅父親，仲要衷心同我至親愛嘅師父講一句：「謝謝您！」
Alice Chan（陳雅詩）
（Reg. Psychologist）香港註冊心理學家
（Chartered Herbalist）加拿大特許西草藥師
M.Sc.（University of London）
High Dip. Pharma Tech.
Email：alice@wherbta.com
Dr. Bonita T.Y. Chan（陳德宜）
Registered Herbalist加拿大安大略省註冊西草藥師
（Nutritionist）營養學家
Ph.D（The Chinese University of Hong Kong）香港中文大學生化博士
前美國Baylor College of Medicine,Texas Medical Centre疾病機理研究員
前美國University of Pittsburgh疾病機理研究員
Email：bonitatychan@wherbta.com
網址：www.facebook.com/wherbta