個半鐘速遊犀牛石

朝軍營閘口左邊入

夏天行長途山一來辛苦、二來有中暑風險，熱愛行山的朋友好趁炎夏來之前衝多幾轉喇。今日介紹的犀牛石位於赤柱半島南部，乘搭新巴14號在赤柱炮台落車便可到達起點，山徑入口就在軍營閘口左邊，見到「進入營區後 限速15公里」警告牌旁的樓梯轉上去就啱o架喇！謹記，開心影相時盡量不要向着軍營，當日小記拍攝附近環境時，便有軍人提醒不要拍到營區，要留意囉。

前往起點的最直接方法，是乘搭新巴14號到赤柱炮台落車。	見到「進入營區後 限速15公里」警告牌旁的樓梯，便是登山入口。	登山路線很明顯，不用20分鐘便可到頂。

先登山頂標高柱

上山路徑十分清晰，上升60米左右便到達海拔177米的山頂標高柱，一般人不用20分鐘便可登頂。不過，山頂位置無景觀可言，只有一個發射站，若要到犀牛石、欣賞大潭灣一帶靚景，就要沿標高柱右方的小徑下山，再多走20分鐘了。從斜炮頂下降至犀牛石並無官方標示，但沿途總算有絲帶引路，只要一路朝東南方落山，其實都唔難搵。惟部分山徑是陡峭沙石路、又要作小量攀爬，對行山新手也許是個小考驗。雖有人在斜度較大的地方設置了繩索，但小記發現不少落地支點已鬆脫，還是別過於依賴。

上到山頂會見到發射站及標高柱，右轉可通往犀牛石。	沿路可欣賞大潭灣一帶靚景，赤柱監獄就在腳下。	落犀牛石並無官方標示，但沿途有絲帶引路。

犀牛石欣賞海天一色

落犀牛石的沿途景觀非常開揚，大潭灣、赤柱監獄及鶴咀半島盡在眼前，再望遠一點，還有海天一色的無邊際海景，賞日出就啱晒喇。下降至山腰便見到犀牛石，外形及紋理都非常似一頭犀牛（亦有似野豬的說法），大自然的鬼斧神工真奇妙！由於犀牛石已有一定風化，建議不要攀爬，為呃Like冇咗條命就唔抵啦。休息一會後可沿路折返，到標高柱後左轉返回軍營，或右轉經小徑通往近富豪海灣的黃麻角道出口，不過此路較崎嶇，只適宜有豐富遠足經驗人士。

山上有不少形狀奇特的大石，有些位置僅夠一個人通過。	聖士提反灣相對清靜，可靜靜地享受日光浴。	赤柱軍人墳場為戰時捐軀的軍人而設，圖為墳場入口。

聖士提反灣日光浴

大熱天時行完山，有乜爽過落沙灘浸個暢快呢？離軍營僅20分鐘步行距離的聖士提反灣，確是一個好地點，這裏比赤柱正灘清靜得多，平日可以靜靜地享受陽光，喺香港冇乜幾多呢啲地方o架喇。毗鄰的赤柱軍人墳場更被譽為全港最優美的墓園，鍾意影相的朋友不妨去探索一下，但記得保持寧靜啊！在赤柱半島，已列為歷史建築的八間屋、美利樓，以至售賣香港特色紀念品的赤柱市集都是旅遊熱點，之後再喺赤柱大街吹下海風、歎個Tea，係咪諗起都爽呢？

被譽為全港最優美墓園的赤柱軍人墳場，是不少攝影愛好者熱門取景的地方。	位於赤柱大街的「八間屋」，已獲評為歷史建築。	赤柱市集有不少香港特色紀念品出售，很多海外遊客都慕名而來。

撰文：鄭浩文

攝影：方偉堅