實試新Apple Watch飛甩手機通話

香港人上網成癮，就算銀包唔跟身，手機都一定要跟身，不過從今以後，大家連手機都可以飛甩埋！事關內置eSIM網絡功能的Apple Watch Series 3 LTE已正式抵港，可以打出打入電話之餘，仲支援上網開Siri及串流播歌，即刻同大家實試佢有幾好玩！

售價︰$3,188起

錶冠加設紅點

Apple Watch Series 3 LTE首賣之初，只有中、日兩地為亞洲首發地區，等了又等，新錶終於趕及農曆新年前在本港開售。外形上，LTE版跟標準GPS版幾乎一樣，均設有38mm及42mm屏幕尺寸選擇。錶殼則有鋁金屬、不銹鋼、精密陶瓷3款可揀，錶底內置心率監測器，錶側同樣有Digital Crown，最大分別是錶冠塗有紅點以資識別。

共用數據計劃

雖然Series 3 LTE支援4G LTE/UMTS網絡，但錶身沒有明顯天線，更沒有SIM卡槽。原來屏幕便是其天線所在，並採用內嵌式電子SIM（eSIM），節省空間之餘也簡化設定過程。實試所見，在啟動服務前，用戶先要更新iPhone至iOS 11.2.5版本及電訊商設定，之後進入程式內的「Mobile Data Setup」便能逐步完成設定。惟要留意，手機及手錶必須選用相同網絡商，開啟後兩者將共用同一個數據計劃。

手錶懂得偵測及使用附近網絡，若靠近iPhone便會自動連線。

喇叭輸出夠響，但開到最大聲有點拆，這時可篤芒調校音量。

心率監測器經重新設計，並印有「LTE」字樣。

隔空如常通話

實際操作方面，手錶懂得偵測附近最快的網絡，靠近iPhone時會經藍牙或Wi-Fi與之連接；若跟手機斷了線，則會自動啟動LTE模式。另設有撥號介面，讓用家檢查聯絡人及通話紀錄。話音質素跟手機的Speaker Phone差不多，收音咪接收力頗強，就算垂下手都能聽得清楚。而且飛甩手機後，手錶也能如常收到通知或叫出Siri，並可串流播放Apple Music，啱晒鍾意聽歌的跑友使用。

Digital Crown錶冠塗有紅點以資識別。	設有獨立撥號介面，數字鍵敏感度高，不難操作。	可檢查通話紀錄，點選號碼便能回撥。
進入《Apple Watch》內的「Mobile Data Setup」頁面，便能完成網絡設定。	手機及手錶必須選用相同網絡商，暫時香港只有csl及1O1O提供服務。