KOL實試！ Transay IU 雙向外語翻譯

聖誕新年長假就到，相信不少人已計劃外遊輕鬆一下，身處外地最驚就係雞同鴨講，就算識得講日文、韓文，去到西班牙、德國、法國等地又點算好？原來靠近期熱爆的翻譯器，便可用中文同對方溝通，撳個掣即可將幾十種語言進行雙向翻譯。今次請來識講多國語言的YouTuber香格拉，以及精通日語嘅KOL黃紫盈，實試Transay及IU雙向翻譯器，睇吓係咪咁好用！

主持兼KOL黃紫盈（右）、混血YouTuber香格拉（左）實測翻譯神器！

Transay支援28種語言

Transay外形似足一支錄音筆，修長設計方便手持及袋落褲袋。最吸引是機身備有2吋屏幕及多個按鍵，可調校翻譯設定、音量等，同時內置錄音功能，毋須連接手機夠方便。此機支援28種語言，包括普通話、粵語、英語、丹麥語、德語、西班牙語、法語、日語、韓語、葡萄牙語、泰語等。用法相當簡單，機身備有A、B兩個收音按鍵，分別代表兩種語言，長按再講出指定語言之後，系統便會透過雲端資料庫進行翻譯，並於屏幕顯示翻譯結果和同步讀出。值得留意是它透過雲端翻譯，所以必須插入SIM卡或經Wi-Fi上網。

Transay 售價：$2,190（a）

機頂備有耳機插口，可以重播翻譯結果。

設有SIM卡槽，對應4G網絡進行即時翻譯。

支援28種語言，惟每次都要進入「對話設置」設定。

IU的骰設計配對手機

來自台灣的IU口譯機，外形的骰可愛，仲設有手繩孔以便掛手或掛頸。機身用上白色簡約設計，只有microUSB充電插口、電源鍵及I、U兩個按鍵。用家需要於Android或iOS裝置下載《IU》應用程式，再經藍牙將IU和手機配對才能使用。之後便可於App內選擇I及U分別代表的語言，包括普通話、粵語、阿拉伯語、希臘語、法語、德語、印尼語、俄羅斯語等20種語系，使用時長按機身的I或U鍵講出相關語言，App就會顯示並讀出翻譯結果。廠商表示現正研發離線翻譯功能，而Android測試版最近已經上架，去到外國與當地人溝通更加方便。

IU 售價：2,980新台幣（b）

用家可編輯文字，即使辨識語音出錯亦可作出修改。

I、U按鍵分別代表兩種語言，長按即可進行翻譯。

IU設計的骰，機頂備有喇叭及手繩孔。

香格拉試法語、西班牙語簡單用語冇難度

想知道翻譯器是否實用，最直接當然係搵精通多國語言的YouTuber香格拉測試，佢本身係巴西、西班牙混血兒，能說一口流利法語和西班牙語。香格拉首先試用法語、粵語雙向翻譯功能，講一些簡單句子如「好耐冇見」、「多謝」等，兩機都能成功辨識兼翻譯！之後將難度升級，用法文問複雜句子，例如問Transay「你可唔可以請我食薯條」，而IU就問「你可唔可以請我食麵」，香格拉覺得翻譯結果都幾準確，唔太熟悉廣東話嘅佢都明白，帶去旅行一定用得着。至於西班牙語測試，Transay及IU都成功譯到「生日快樂」及「聖誕節快樂」等，似乎簡單句子都難唔到兩部機。不過亦有失敗例子，例如以西班牙語講「我真係好靚」，西班牙語辨識正確，但譯做廣東話時就變成「我真係好正」，用語似乎太俗。

香格拉測試完法語及西班牙語後，覺得兩機嘅翻譯效果都唔錯。

香格拉以西班牙語讀出「聖誕節快樂」，IU成功翻譯成中文。

以西班牙語向Transay講「你好」、「早晨」、「生日快樂」，成功翻譯並讀出廣東話。

以西班牙語向Transay講「你好」、「早晨」、「生日快樂」，成功翻譯並讀出廣東話。

黃紫盈試日語、普通話小心專有名詞

第二關搵嚟曾於日本留學嘅星級主持黃紫盈測試日文，先以廣東話講「早晨，你好嗎」熱身，黃紫盈發現兩機各自有不同譯法，Transay就準確譯出日文，而IU譯出「你朝早好嗎」，不過意思都屬問候語句，合格！跟住嘗試模擬於日本餐廳對答，先問「歡迎光臨，請問幾多位」，兩機都成功譯出「歡迎光臨」的粵語，但後半句Transay及IU就譯成「你喺度嗎」以及「你叫咩名」，呢部分只係啱一半。之後試用廣東話問「大阪燒」、「代官山」等專有名詞，但兩機只會字面直譯，去到日本應該冇人聽得明喎！再試用普通話、日文雙向翻譯，以普通話講「今天天氣很好」，兩機的中文辨識及日文翻譯完全正確，表現有驚喜。黃紫盈試玩後有少少貼士畀大家：「如果去旅行想用翻譯機，普通話的辨識率會較高；但唔好完全相信翻譯結果，如果見到對方一頭霧水，就有可能翻譯結果出錯喇！」