揸方程式出街！BAC MONO自得其樂

單座享受自主駕駛

若說吸睛度，揸MONO肯定冇得輸，不過部車得一個位，就算有朋友想來個Free Ride，都是愛莫能助，無論去邊都只能獨自享受。冇所謂啦，玩呢啲車都係求駕駛快感，少個人在旁邊「o依嘩鬼叫」仲好，對不？毫無疑問，BAC MONO是一部劃時代跑車，難得的地方不僅是導入方程式賽車的高規格及先進技術，最正的是可以在一般道路行駛。BAC HK董事總經理Duncan Lee直言，揸MONO可以獲得一種原始駕駛感，全車沒有電子穩定輔助，甚至連最基本的循迹系統也沒有，非常適合喜愛自主駕駛的車迷。他又指，未來版本或會加入Traction Control，而且可讓駕駛者選擇開關。

BAC HK一眾高層及嘉賓與MONO合照。	在發布會後的周六及周日，BAC MONO珠海國際賽車場賽道體驗亦緊接上演，讓一眾車主及傳媒，感受BAC MONO的駕駛樂趣。	多部BAC MONO在賽道上飛馳，爆發最原始的速度與駕駛感！

Mountune引擎馬力達305匹

論實力，MONO拍得住當今最頂級的Hypercar，2.7秒就可完成0~60mph（96km/h）的加速，相信好多人（包括筆者）都好想知它搭載的是甚麼引擎？據廠方講，新MONO已改配Mountune的2.5公升引擎，而非早期所採用的280匹Cosworth 2.3直四，馬力上升至305匹，加上車架結構採用超輕量碳纖維物料製造，全車重量竟可低至580kg，比起傳統跑車輕一個「DOUB」，波箱又是方程式規格的Hewland六前速序列式，點可能唔快？雖然，MONO的極速只是272km/h左右，同Hypercar仲有一段距離，但是在車上的速度感，是一般汽車無辦法畀到你。正因為MONO採用無上蓋、無擋風玻璃的開放式設計，開車時記得戴頭盔及手套，就算香港冇法例強制咁做，但一個唔覺意被石仔打穿頭，到時就唔好怪人。

香港著名賽車手關兆昌（圖）和李萬祺也出席體驗活動。

BAC HK董事總經理Duncan指，MONO的年產量僅約70部。

車身輪圈制動可升級

或者你會問開放式座艙是否安全，其實咁講，運輸署畀得你出牌，應該都唔會差得去邊啩？BAC表示，MONO的底盤以極堅固的碳纖維夾層結構及精鋼製成，並配置了FIA規格的防滾架，對安全性絕不妥協，目前在英國、美國、德國、日本及香港等地方都可在道路上合法使用。為迎合不同身形的駕駛者，除了座椅可作調校外，就連腳踏及軚盤距離都可進行調整。Duncan指，MONO有大量配件可進行升級，車身、輪圈、制動以至懸掛設定等部分都有得改。至於駕駛席設在正中間的布局，一般人揸數小時便會適應，而且有減低重量分布不勻的好處。目前BAC的年產量只是70部左右，現時訂車，最少都要等三個月至半年才有車交。

跑車以單座位布局，並配上6點式安全帶。	輪圈及制動系統都可進行升級，進一步強化煞車效能。	車身多個部分都用上碳纖維製造，全車僅重580kg。
軚盤採用可拆式設計，中央屏幕可顯示油溫、水溫及各種行車資訊。	空氣動力學套件經過精密設計，有助減低亂流及空氣阻力。	懸掛組件完全外露，成部方程式賽車咁樣。

特派記者：鄭浩文　

查詢電話：3792 0299（BAC Hong Kong）