首爾實試NBA 2K18 MyCAREER鬥波升呢

今年NBA變動多多,巨星轉會、波衫轉贊助商,連籃球遊戲都加入新元素,講緊係快將推出嘅《NBA 2K18》。遊戲製作人Erick Boenisch日前特別在韓國首爾舉行發布會,率先畀中、港、台傳媒試玩,新作除咗雲集歷來最強球星於一隊的All-Time Team之外,招牌嘅MyCareer模式都有新搞作,融入開放世界及RPG玩法,角色可以去街場鬥波、健身室操肌,甚至買鞋買波衫,藉此「升呢」打入NBA。

All-Time Team經典雲集

早幾代《NBA 2K》系列已加入經典球隊,今集再新增有「Big Four」年代嘅03~04湖人、上演「黑八傳奇」嘅06~07金州勇士等17隊球隊,令經典球隊增至62隊。而球隊每個年代都有代表性嘅球星,有冇諗過Shaquille O'Neal、Kobe Bryant、Magic Johnson、Kareem Abdul-Jabbar一眾湖人名宿可以同場比賽呢?《NBA 2K18》就可幫你實現願望,皆因All-Time Team全時制霸陣容可跨時代組成29支超級球隊,正選後備粒粒皆星,唯一美中不足係全部球員穿上現代球衣,如果有番當年嘅懷舊Look就更原汁原味。

玩家線上版圖互動

育成原創球員嘅MyCAREER模式,今集加入「Run the Neighborhood」玩法,一眾玩家自訂角色後可於同一線上版圖互動,這種類似MMORPG的開放世界提供不同類型活動,例如可到NBA商店買波衫裝備、於Foot Locker選購超過2,000款球鞋,大街上更有紋身店、髮型屋等,隨時讓玩家改變造型。另有健身中心可提升角色能力,還加設2K Zone小遊戲,例如迷你投籃機、預測NBA真實賽果等,藉此賺取虛擬貨幣。升級角色都係為咗打波,大街上的球場可玩1對1、入樽等,而由MyPark變種而成的The Playground,更可與不同玩家組隊鬥波,終極目標係打入NBA。至於玩家的大屋備有個人球場可練波之餘,亦能邀請線上朋友作客打《NBA 2K18》,玩味勁濃。

明天序章免費下載

逼真畫面一向係遊戲強項,新作連細節位都唔放過,例如臉部膚質、手臂紋身等都如實呈現,製作人Erick表示,連一啲冇咁出名嘅球員如孟菲斯灰熊的Ben Mclemore、洛杉磯湖人新秀榜眼Lonzo Ball等,都會進行人臉掃描提升逼真度。同時將球衣、球鞋、護具等進行雷射掃描,令顏色、縫線、紋理都似足實物。值得一提,《NBA 2K18》將首度登陸任天堂Switch,所有模式及內容都可玩足,加上可以拎出街打機,絕對值得入手。而明天(9月8日)開始,用家可到網上商店免費下載序章試玩,以自創球員於街場鬥波,進度可以保留至正式版遊戲,粉絲們冇理由錯過!

DETAILS

類型:籃球運動

發行:2K Games

推出日期:9月19日

售價:$468(標準版)、$778(傳奇珍藏版)、$1,168(黃金傳奇珍藏版)

特派記者:林子聰

鳴謝:Take-Two Interactive