Volkswagen Golf GTI Performance超爽自動波

全新7.5代Volkswagen Golf已到咗香港，追求高性能版的車迷更要留意，皆因全新的Golf GTI Performance不但馬力提升至245ps，仲要係首次有DSG自動波版輸港，又要快、又唔想成日塞車吊極力子咁煩，呢部車係咪好啱你胃口呢？同時，車廂各項設備的顯示介面已全面數碼化，中控台的全新多媒體娛樂系統（MIB）屏幕更加大至8吋，無論性能及設備都稱得上大升級。

Volkswagen Golf GTI Performance<br>售價：$419,980起

Volkswagen Golf GTI Performance
售價：$419,980起

引擎強悍煞氣外觀

本港有售的新Golf共有6個版本，今次測試的Golf GTI Performance是車系的「二當家」，性能僅次於旗艦的Golf R，搭載的引擎為全新第3代2.0公升渦輪增壓直噴，引擎反應尤其靈敏，一畀油就有反應，比上代更爽！相比起Golf Match、Golf GT Sport等定位較大眾化的車型，Golf GTI Performance的外觀就有煞氣得多，除咗車身裝上跑化擾流套件外，仲有19吋軨、左右雙出尾喉、Dual-L LED日行燈及熏黑尾燈罩等，加上車尾配置了動態指揮燈，燈槽會由內至外亮起，夜晚揸出街必定養眼度爆燈！

引擎低轉扭力非常澎湃，加速力超爽！	尾燈整合了動態指揮燈，燈槽會由內至外亮起。	左右雙出排氣喉，別具運動風格。
原廠配上19吋輪圈，輪胎尺碼為225/35 R19。	車頂設有電動天窗，大大增加開揚感。	軚環用上D形平底設計，並用上紅線縫製。

拖波入彎極暢順

全新Golf GTI Performance的性能亦有所增長，馬力、扭力分別提升至245ps及370Nm，配合轉波特快的七前速DSG自動波箱及電子液態機械差速鎖（VAQ），於山路快跑自然得心應手得多，彎前拖波到扭軚入彎的過程一氣呵成，加上電腦補油非常精準，無論升或降檔，甚至連拖幾個波都十分順暢，比起改款前的手波版易操控得多，相信本地用家會更為受落。另一方面，標配的運動懸掛將底盤降低了15mm，配合4條Pirelli P Zero高性能輪胎（225/35 R19），彎路極限及穩定性都得到大幅增強。可能有人話冇支棍冇咁好玩，但呢刻都冇辦法，皆因首批Golf GTI Performance全為DSG版本，若然有支棍揸手先安樂，不妨問吓車廠有冇得訂喇！

前座以半桶形設計，駕駛席另設電動調校及記憶功能。

後排可3人同坐，並設有獨立冷暖氣送風口。

尾箱空間算不錯，足夠擺放大型行李篋。

配置12.3吋數碼錶板

作為Golf的高階版，DCC已列為標準配置，唔止行車模式（節能、舒適、一般、運動及個人化）有得揀，就連懸掛軟硬度都可隨時切換，試過將避震校至最運動化，濾震效能其實都不會差好遠，除非對乘坐質素有好高要求，否則長期用住「運動」模式行車都唔大問題。新Golf的另一焦點是配置了更多數碼化系統，於Golf GTI Performance上，12.3吋數碼錶板（Active Info Cockpit Display）及8吋Composition Media均為出車配備，錶板除可按喜好選擇顯示介面外，行車資訊亦比起傳統的機械指針式錶板詳盡得多。油耗又點？原廠數據是6.3L/100km，即約$0.9/km。慳唔慳？梗係慳啦，不過買得GTI Performance，唔係就住腳揸呀？