加時尾班車BMW 218d Gran Tourer

唯一歐系輕型柴油MPV

近年嘅七座MPV市場再唔係日本車玩晒，歐洲多個車廠都大舉進襲，高中低價位都有得揀，當中有豪華品牌，也有大眾化的，歐、日MPV加起來閒閒哋都有十幾廿款，多到眼都花埋。不過咁，假如閣下對柴油MPV情有獨鍾，就唔使點煩惱，皆因市場上來來去去都係得嗰幾部，當中的歐洲輕型七人車，更只有BMW 218d Gran Tourer，揀都唔使揀，要選擇的只有買或不買。咪以為車價一定好貴，實情只係$359,900起，德國名牌加上柴油的動力及油價優勢，預期未來四、五個月都會持續大賣，揸開日本MPV的朋友係咪好有衝動換車呢？係就要把握時機啊！

車廂布局富時代感，設備亦相當齊全。	儀錶板採用BMW慣常用的雙圓形設計，行車資訊清晰易讀。	多功能軚盤以皮革包裹，可控制通話系統。
中排座椅可獨立前後滑動，而且可調校椅背角度。	中控台上方的屏幕整合了後泊鏡及Park Distance Control，泊車都簡單得多。	中、後排座椅都可翻平，藉此擴展載物空間。

採用單出排氣喉

如果唔睇車身的徽章，只憑外觀分汽油定柴油版，相信只有BMW Die-hard Fans或內部員工先做得到，皆因兩者不同的地方只有一個，就是柴油版的排氣喉為單出，有別於汽油版左右各一的設計，唔講點會留意到？2系GT走休閒路線，外形唔似得傳統七人車成個箱咁，望落仲有幾分動感，後生仔女揸都一樣啱Feel，載朋友去玩都唔似揸咗阿爸部車，呢吓緊要呀！車廂布局有好多玩法，唔止中、後排座椅可獨立翻平，整個中排甚至可作前後滑動及調校椅背角度，空間分配全由自己話事。為方便個子不高的人士，中排座椅更設有自動翻平功能，只要輕輕拉起尾箱兩側的按鍵，椅背便會向前翻，完全不用擔心唔夠手長操作的問題。行李箱的容量最多可擴展至1,820公升，咁即是有幾大呢？一般可帶上飛機的手提行李篋容量約為35公升，咁有啲概念未？

天幕面積幾乎覆蓋整個車頂，為車廂注入大量光線。	原廠配上17吋輪圈，輪胎尺碼為205/55 R17。	頭燈設計非常醒神，目光銳利。

外觀內裝均齊料

2系GT始終不是Full Size MPV，尾排的乘坐空間不能有太高要求，大人坐冇話唔得，但高佬都係坐前排好啲。整體嚟講，218d Gran Tourer作為一部實用型車款，整體水平都幾高，雙區冷氣、後泊鏡及Panorama天幕等均為標準配備，座椅皮革亦與220i Urban同為Sensatec，雖然質感冇高階車款常用的Dakota及Nappa咁好，但乘坐舒適性都唔錯，而且幾透氣。畀多$2萬，仲有埋Comfort Access及電尾門，雖然幾抵，但呢啲設備又唔一定要有，有「筆直」就裝，唔裝亦冇話蝕。外觀基本上都幾夠睇頭，日行燈、高置尾翼全部落齊，配合尺碼恰到好處的17吋輕量合金軨，觀感幾令人討好，仲要配上Runflat輪胎，咁嘅價錢有咁多設備，都算係咁。

車長超過4.5m，足以容納三排座椅。	引擎的低扭輸出澎湃，而且十分慳油。	行車模式有ECO PRO、COMFORT及SPORT選擇，駕駛者可隨時切換。

扭力強加速更爽

動力配置上，218d Gran Tourer搭載的2.0公升直四BMW TwinPower Turbo柴油引擎，可輸出150hp馬力，唔好比呢個數字呃到，以為力量平平，實情其扭力達到330Nm/1,750rpm，比起220i多成50Nm，起步、加速都非常爽快，結合八前速Steptronic自動波箱，9.3秒就可從靜止加速至100km/h，預載的行車模式仲有ECO PRO、COMFORT及SPORT揀，部車個性想變就變。另一方面，Performance Control在218d上同屬標配，當汽車轉向的時候，系統可按實際需要將不同的動力或煞車力度應用到個別車輪上，一般情況下，會對外圈車輪提供較大的動力輸出令轉彎更順，藉此提升操控表現及行車安全性。仲猶豫買柴油定汽油版的朋友，不如考慮埋油耗表現，218d Gran Tourer的百公里綜合油耗為4.3至4.5公升，大概$0.53/km，若計埋折扣，每公里燃油成本僅$0.3至0.4。至於220i的官方油耗數字為6.2L/100km，油費隨時貴218d一倍以上，咁你諗喇。

BMW 218d Gran Tourer SPECIFICATION

車型：五門七座位MPV

引擎：四缸BMW TwinPower Turbo柴油

容積：1,995c.c.

最大馬力：150hp/4,000rpm

最大扭力：330Nm/1,750rpm

傳動：八前速Steptronic自動波

驅動：前置引擎、前輪驅動

綜合油耗：4.3~4.5L/100km

車身體積：4,556×1,800×1,641mm（長×闊×高）

售價：$359,900起

撰文：鄭浩文

攝影：蔡浩文

查詢電話：3129 9000（BMW HK）