Mazda2 GVC 1.5 與豪並進

兩年前奪下「2014~2015日本風雲車」頭銜的Mazda2，最近再增添一名新成員「Mazda2 GVC」，除加入全球首項的G-Vectoring技術外，車廂用料及設備更趨豪華化。Mazda2都玩豪？無錯，車廂大量應用了原廠皮革，還有電動發熱前座、全彩Active Driving Display等，加上更出色的隔音表現，猶如置身於貴價揭背車中。睇番價單，其定價$19萬都唔使，真係幾抵吓！

售價：$189,900

G-Vectoring技術助穩定

平嘢冇好？又唔一定嘅，Mazda2就是好例子，話晒攞過「日本風雲車」大獎，你估流o架？全新Mazda2 GVC的外觀沒大幅改動，玩Photo Hunt要你喺30秒內找出5個不同地方都唔係一件易事，不過都冇所謂啦，Mazda2本身夠靚仔、唔使點執，二來GVC版係講內涵，睇嘢唔好咁表面。部車叫得做GVC，Mazda自主研發的G-Vectoring技術當然唔會冇啦，這個率先應用於Mazda3的技術，現已廣泛配置到多個車系（包括Mazda6、CX-5），系統可因應轉向操作來調節扭力輸出，以統一控制G-Force，實現順暢高效的行車表現。事實上，Mazda2 GVC的過彎搖晃明顯少咗，好處是揸車冇咁攰，乘客亦冇咁易暈車浪，G-Vectoring的原理雖簡單，實際效用卻幾大。

黑色座椅用上皮革及麖皮包裹，廠方另提供白色皮作選配。

車廂多個部分都用上皮料包裹，增添豪華感。

SKYACTIV引擎非常慳油，可省回不少油費。

皮革座椅格調豪華

第一眼見到個車廂，心諗使唔使落咁重料呀？不僅前座用上皮革及麖皮包裹，就連中控台都包上皮料，還有香檳金色的出風口，每個細節都滲透着豪華格調，在車價僅十多萬元的Mazda2上出現，真係估佢唔到。坐上駕駛席，眼前的Active Driving Display看似冇乜特別，實情顯示已由過往的單色改為全彩色，資訊更包括車速、導航以至道路限速提示，不論在晚間或陽光普照的環境下都可清晰閱讀。同時，車載資訊娛樂系統MAZDA CONNECT不但可用作音樂串流，還支援免提通話及網絡電台，單靠一個圓形多媒體操控鍵便可輕鬆控制大部分功能，歌名又可顯示多國語言，所有嘢都設計得好User-friendly。

側鏡具備自動摺合功能，並加大了指揮燈範圍。

資訊及娛樂系統可利用多媒體操控鍵控制，操作簡易又方便。

頭燈整合了LED日間行車燈，顯得分外醒神。

隔音物料增寧靜度

為提升車廂寧靜度，原廠特別為Mazda2 GVC換上隔音的前擋風玻璃，並於引擎艙、尾門及行李箱等位置加入吸音物料，開到高速公路上，在車廂中仍可輕鬆對話，其寧靜度在小型車中可說數一數二。動力配置上，Mazda2 GVC搭載1.5公升SKYACTIV-G四缸自然吸氣引擎，不喜歡CVT的朋友要留意喇，呢部車係配上六前速加/減波，揸起嚟零舍有Feel。雖然115匹馬力唔算得話好出眾，不過以一部只有約4米長的Hatchback嚟講已夠晒用，載着3名成年人上斜都冇話拉牛上樹的感覺。根據NEDC，每公升油可行駛19.6km，即每km燃油成本只要7毫幾子，部車咁慳油，揸起嚟唔使就住就住，用車都開心啲啦！