4大Check Points攝戰太平清醮日與夜

今日係佛誕公眾假期，唔少人都會湧入長洲，感受一年一度太平清醮盛事，朝早食個平安包、下午睇飄色、晚上影包山王決戰。不過現場人山人海，想影到別出心裁作品梗係要有備而戰，今年一於帶齊無反、360攝錄機同Action Cam等，以不同角度盡攝太平清醮日與夜。

GH5配備3.2吋反芒設計，同平安包自拍冇難度。

Check Point 1：GH5無反自拍平安包兼打卡

朝早入到長洲想搵嘢食？其實可到北社街買個平安包應節，食落肚之前當然要自拍兼打卡，Panasonic LUMIX GH5無反相機設有3.2吋162萬像素側揭式屏幕，加上機身配備五軸雙影像防震系統及Wi-Fi功能，Selfie食平安包靚樣夠晒定。而且相機內建6K照片拍攝模式，能夠從6K@30p影片中擷取高達1,800萬像素相片，甚至可配合生動、深刻藝術、正片負沖等濾鏡特效一併使用，唔使用軟件後製都拍到與別不同的作品。

GH5售價：$17,800（淨機身）（a）

轉盤提供6K照片拍攝模式，可於影片中擷取一格1,800萬像素相片。

備有多種濾鏡特效果，例如用玩具相機拍攝，黑角效果可突出主體。

Check Point 2：Theta SC 360度全景包山

沿着北社街可到達北帝廟遊樂場，這裏聳立了3座包山，絕對是影相博Like的好地方。大家可嘗試以Ricoh Theta SC這類360攝錄機拍攝，優點係完全毋須構圖，只要將部機高舉，就能夠一次過飽覽3座包山、北帝廟和附近景物，甚至玩埋人景合一都冇問題。機身內建Wi-Fi功能，可即時將相片和影片過落智能手機，甚至直接放上社交平台，碌住嚟睇相睇片好似置身現場一樣。

只要高舉Theta SC 360 Cam，即可影晒包山，輕易做到人景合一。	Theta SC售價：$2,890（b）	App可直接將360度影片或相片上載到facebook、YouTube等社交網站。
360度影像做到無縫接合，最過癮的地方係可以用手機碌住嚟睇相。

Check Point 3：GoPro 高舉低炒飄色

太平清醮嘅重點活動係下午舉行嘅飄色巡遊，喺2:00pm開始前沿途大街小巷都擠得水洩不通，不妨使用輕巧便攜的GoPro Hero5 Black運動攝錄機，鏡頭夠Wide足夠影大環境，配合3-Way自拍棍，高舉機身就唔怕有其他遊人擋喺你前面，同時低炒亦唔使俯身取景；加上Hero5 Black支援語音控制功能，只要講出指令就能夠影相或拍片。假如現場環境太嘈雜，未必識別到語音的話，亦可透過《Capture》App實時操作設定，甚至乎預覽畫面。

GoPro Hero5 Black機身夠輕，可配合3-Way自拍棍長時間高舉攝錄。	售價：$3,200（Hero5 Black）、$640（3-Way自拍棍）（c）	機身支援語音控制，對住部機講「GoPro Start Recording」或「GoPro Take a Photo」即可拍片或影相。
由於飄色巡遊路線會穿過不少小巷，因此鏡頭角度要夠Wide先影得晒。

Check Point 4：SX430 IS 45倍Zoom包山王

來到夜晚的重頭戲，當然係極之刺激的「搶包山」比賽，不過就算你拎到飛入場，包山四周都有圍欄阻隔，因此要特寫包山健兒的表情和動作，便需要用到「長炮」遠攝鏡頭，不過長炮又大又重，孭住成日都幾辛苦，不妨考慮Canon PowerShot SX430 IS天涯機，其機身只有306g，並提供45倍變焦，能夠Zoom到1,080mm焦段咁遠，無論係用廣角影大環境，抑或遠攝包山王都應付得到，配合IS防震系統，即使手持拍攝都唔會鬆郁朦。

SX430 IS鏡頭提供45倍變焦，無論遠近影包山都兼顧得到。	SX430 IS售價：$2,380（d）	相機備有Wi-Fi功能，可配對手機、電腦、雲端等將影像備份及分享。
「搶包山」最精彩必定是於塔頂你爭我奪的情景，要捕捉健兒動作，就必須配備長炮相機。