北京直擊！小米6雙鏡景深誘人

今年4月剛好係內地品牌小米成立7周年嘅大日子，廠方乘勢於北京發布旗艦作小米6，用上當今最強的Qualcomm Snapdragon 835處理器及6GB RAM等硬件，仲大玩雙鏡變焦、四曲面玻璃設計，賣點多到你估唔到！最估唔到係機價，2,499元人民幣起有交易，無論係唔係「米粉」都覺得吸引。

售價：2,499元人民幣（64GB版）、2,899元人民幣（128GB版）、2,999元人民幣（陶瓷尊享版）

尊貴陶瓷物料

今年小米發布會由過往的國家會議中心，改到北京工業大學體育館舉行，地點有新鮮感，小米6同樣有突破。機身不但支援生活防濺水，機背仲換上一片四曲面玻璃，上下左右四邊均微微彎曲，配合光面不銹鋼邊框，美感十足。配色亦有驚喜，除了亮黑和亮白色，更加入新色亮藍，配以拋光金色邊框勁浮誇。自上代小米5及小米MIX開始，廠方就頻頻使用陶瓷物料，新機亦提供陶瓷尊享版，換上陶瓷機背及18K鍍金相機環，價錢只係比一般配色版貴一百元人民幣，抵玩！發布會現場更有展示亮銀版，機背近乎鏡面設計，可惜創辦人雷軍直言受技術所限，暫時未能量產。

頂級硬件規格

小米產品嘅硬件向來落足本，現時最強的規格幾乎都可於小米6搵到，包括Snapdragon 835八核心處理器，並提供64GB及128GB容量選擇，現場以跑分軟件《AnTuTu》測試，得分逾18萬分，成為榜上最高分的Android手機，難怪官方稱新機為「性能怪獸」。硬件唯一要挑剔係5.15吋屏幕，解像度仍只得全高清級數，幸好加入一系列貼心功能，包括國家眼科診斷與治療工程技術研究中心認證嘅減藍光護眼模式，以及4,096級背光調節，屏幕亮度可調至最低1nit，夜晚撳電話都唔怕屏幕刺眼。

小米6用上5.15吋屏幕，預載Android 7.0系統及MIUI 8介面。

機底設有USB Type-C插口，惟取消了3.5mm耳機插口。

四曲面玻璃機背加上金色邊框，手感一流。

雙鏡一按變焦

近年手機興玩雙鏡頭，新機亦玩埋一份，兩個1,200萬像素後置鏡頭分別支援27mm廣角及52mm長焦，拍攝介面會出現「1×」、「2×」字樣，一按即可切換鏡頭，可以2倍光學變焦或10倍數碼變焦拍攝，同一距離影Close up更加輕鬆。另一特別之處係新增人像模式，可使用52mm長焦令背景更添朦朧，但主體依然清晰銳利。鏡頭亦支援四軸光學防手震，加上可拍攝4K解像度影片，手持拍攝都幾穩定。特別一提，新機取消了3.5mm耳機插口，跟機將附送USB Type-C轉3.5mm耳機轉插，4月28日於內地正式開賣。

發布會有近3,000名米粉及傳媒參加，全場爆滿。	機背反光效果勁靚仔，配以27mm廣角及52mm長焦雙鏡頭。	陶瓷尊享版（左）及亮銀版（右）同場現身，前者採用6GB RAM及128GB ROM，後者未有公布規格。
《AnTuTu》跑分逾18萬分，成為Android手機之冠。	拍攝介面簡單易用，可一按切換廣角或長焦鏡頭，上方則可開關人像模式。	試相區 27mm廣角鏡頭拍攝下，對焦速度唔錯，影像細緻度不俗。