近日天氣回暖，短衫短褲終於可以出動，但成身膩肉點樣見人？一於做運動操Fit啦！最近小米生態鏈企業華米科技研發的智能手錶Amazfit終於在港開賣，不僅內置跑步、單車等運動模式，並支援GPS定位及實時心跳監測功能，更內置記憶體可飛甩手機直駁藍牙耳機聽歌，最吸引係定價千元有找，諗得過喎！

近年唔少人跑步都會戴上智能手錶，以記錄和監測運動數據，Amazfit嘅設計同傳統運動手錶差唔多，用上47mm直徑大錶面及炭灰色圓形錶殼，外表睇落平平無奇，實情係錶圈採用陶瓷製作，配以錶面Corning Gorilla玻璃，防刮能力極強，而且整隻手錶僅重53.7g，啱晒跑步佩戴。值得留意，官網雖然提供兩款配色選擇，但其實都係同色錶殼分別配以黑色或紅色運動軟膠錶帶，小記試戴後覺得都幾舒服，流汗時錶身亦不會黏住手腕，加上錶帶採用快拆式設計，毋須工具即可更換。惟官方暫時未有提供另購錶帶服務，貪靚的用家可能要自行配其他22mm錶帶了。

操控方面，錶身右側設有一個按鍵，用作開啟及鎖定觸控屏幕，其他功能一律要靠1.34吋屏幕操作。時鐘介面由上向下掃即可作快速設定，下至上掃則可顯示手機通知訊息，而左右掃動可轉換模式包括運動、計步器、心跳、音樂鬧鐘、天氣預報、指南針、計時器、睡眠、訓練中心，惟行貨僅提供英文介面。運動手錶最重要係記錄運動數據，此錶內置跑步、步行、跑步機、單車、單車機、越野跑及滑步機共7種項目，以最常用嘅跑步為例，開啟後會透過GPS偵測位置，並實時記錄及顯示運動時間、距離、配速、心跳等，還會同時記錄卡路里消耗、速度、節奏、路線等，非常詳細。

運動數據除咗可以喺手錶即時查閱外，當用家以手機開啟《Amazfit Watch》App更可將數據同步至雲端，之後便可經《Strava》及《小米運動》等運動程式分析數據，預計之後更新韌體將有更多Apps兼容。新錶另一特點是聽歌功能，用家只要將手錶放上充電底座，再透過USB連接電腦即可將音樂檔案拉到手錶內嘅4GB記憶體，跑步時只要將手錶與藍牙耳機無線連接便可聽歌，唔帶手機都冇問題。其他智能功能包括可連接指定Android及iOS裝置，使手錶同步顯示來電及通知，如閣下用緊MIUI 7以上嘅小米手機，更可用到手錶屏幕解鎖功能，夠晒方便。

處理器：1.2GHz雙核心

記憶體：512MB RAM、4GB ROM

屏幕：1.34吋（320×300解像度）

其他功能：藍牙4.0、Wi-Fi、GPS、心跳感應器、IP67防水防塵

電池容量：280mAh

支援系統：Android 4.4或以上、iOS 7.0或以上

重量：53.7g

瑞士品牌MyKronoz推出的Zefit3 HR，採用新一代三軸加速計及光學心跳感應器，偵測運動數據更準確。另備有彩色觸控屏幕以便操控，還可將數據同步至手機App整理。手帶則提供黑、白、藍、粉紅四色選擇，錶芯可從手帶中拆除更換，襯衫一流。

Nokia旗下品牌Withings出品的Pulse Ox，錶芯設計輕巧，可配合錶帶、夾子等使用。基本功能包括記錄行走步數、攀升高度、距離以及卡路里消耗量等，亦可連接iOS及Android裝置同步數據。另一賣點是電池續航力長達兩星期，不過就不支援防水。

Fitbit早前推出Alta智能手帶獲得不錯評價，最近加推Alta HR引入PurePulse心率記錄功能，而且可透過心跳分析用家睡眠質素。還內置自動運動偵測功能，連瑜伽等非移動性運動的卡路里消耗都可以偵測得到。

查詢：（a）mi.com/hk、（b）2955 5522、（c）www.withings.com/hk/、（d）www.fitbit.com

撰文：林子聰

攝影：盧展程、蔡浩文

模特兒：Yoki Tong