珍寶珠USB手指尋回童真

唔少人細個都鍾意食珍寶珠（Chupa Chups），小小一支糖果棒已讓人樂上半天，原來珍寶珠除咗食得，仲可用嚟儲存資料，說的是珍寶珠官方授權推出的USB手指。今次抵港的有兩款造型，其一是以拖鞋設計，備有紅（士多啤梨）、綠（西瓜）兩色選擇，拔走鞋尾就看到USB插頭；另一款用上原子筆設計，提供紅（士多啤梨）、黃（檸檬）兩色，拔起筆桿一轉即可經USB存取資料，筆頭仲能夠用嚟寫字，容量有16GB及32GB選擇，童年回憶返晒嚟，不過記住唔好攞嚟食呀！