Move It健身器操出智Fit人魚線

申請了健身室會籍,去過幾次就放棄,同自己講明天一定要減肥,偏偏明日復明日。以上經歷相信好多人都試過,趁自己未肥過部電單車,係時候去減肥啦!剛抵港的智能健身組合Move It就幫到你,它由4組不同訓練器材結合而成,配合專用App便能了解健身狀況。今次請來PitStop Fitness教練測試,得出結果是十分適合初學者,最重要是售價$2,680,平過你搵私人教練!

香港蝸居專用

出街做Gym嘅最大難題係經常與人比較,畀旁邊大隻仔望住既自卑又尷尬!去年網上集資推出的Move It讓大家再無藉口。它由鋁合金及塑膠打造,組合後Size僅38.1×20.9×40.2cm,重約3kg,單手能整個舉起搬動,啱晒香港蝸居使用。整套裝置提供4種訓練器材,分別是阻力帶(Resistance Band)、健腹輪(Ab Wheel)、掌上壓器(Pushup Stand)及跳繩(Jump Rope),全部加起來可帶出41種訓練模式,同時照顧到帶氧運動及肌肉訓練需要。

動作做啱先計

聽落以上器材冇乜特別,但其最大賣點是備有智能手柄,充滿電夠用9天左右。手柄能安裝到4種器材之上,並內置3D陀螺儀、壓力計、射頻器及紅外線感應器,配以專用App可因應使用器材,自動識別運動類型,並同步計算次數、時間及卡路里燃燒量。PitStop Fitness高級教練Will試玩後表示:「佢嘅Sensor好準,例如用阻力帶向上舉,若手臂幅度唔夠或左右手力度不均,佢會唔計數。好多人怕自己健身會做錯動作,依家做啱先計數,變相有個教練指導你!」Will補充,透過Move It基本可訓練全身7大肌肉群組,包括胸、背、膊頭、二頭肌、三頭肌、腹部及大腿,帶來全身運動量。

挑戰場鬥身形

女士又點睇呢?高級教練YY則很欣賞專用App設計:「App內提供節奏明快的音樂,可讓人投入運動之中。『挑戰場』則讓用戶與朋友及世界各地人士進行比併,做運動時冇咁悶。」專用App其他功能包括「訓練計劃」及「動態更新」,前者提供人魚線雕刻、甩掉拜拜肉等專業課程;後者則畀大家鬥貼靚爆身形相片呃Like!當然,Move It也非全無缺點,兩位教練不約而同認為它只適合初學者:「佢嘅阻力有限制,用戶唔可以再做重啲,若本身已有番咁上下Fit,想再健碩啲就未必啱用!」

撰文:陳志滔 

攝影:蔡浩文 

場地提供:PitStop Fitness 

查詢電話:2154 4281