菲林機轉生！5吋Ektra懷舊味濃

現時很多人已用手機取代相機拍照，DC銷量難免受到影響。相機市場難做，不如索性改玩手機啦！菲林老牌大廠Kodak推出的5吋Ektra智能手機，除咗植入最拿手嘅影像技術，仲加入2,100萬像素鏡頭、虛擬模式轉盤、Super 8菲林拍攝效果等，無論是影友或文青都啱用。

售價：$4,880

源自經典型號

新機叫Ektra，原來名字大有來頭，正是廠方1941年推出的經典菲林相機型號，雖然用上同一個名，但手機改用5吋屏幕設計，驚喜位是整個機背包上荔枝紋仿皮，一路延伸至機面下方，並壓印上Kodak品牌標誌，質感一流。而機背下方刻意設計成稍稍凸出嘅手把，同時備有實體快門鍵和大面積嘅主鏡頭，遠睇似足一部復古嘅相機。美中不足是機身較厚，而且手把位深度不足，所以較難像傳統相機般手持；幸好機身右側設有手機繩孔，掛住附送的手機繩Snapshot更加穩陣。

模擬Super 8效果

外形帶有相機影子，拍攝規格和功能自然要襯番，新機備有2,100萬像素F2.0大光圈鏡頭，兼容4K拍片及光學防手震技術，連攝影介面都經過重新設計，介面右下角設有一個虛擬模式轉盤，當轉盤轉動時會有震動提示，手感十足，提供智能場景、影片、全景、散景、夜景、運動、微距、人像、風景、HDR、專業多個拍攝模式，無論影日常照抑或人像沙龍都夠用。小記試影後發現鏡頭測光準確，成像色彩自然，整體質素唔錯；惟對焦速度稍慢，期望日後有軟件更新可以解決。

Ektra用上5吋全高清屏幕，不過機面冇任何柯達標誌。

仿皮一直延伸至機面下方，另採用USB Type-C介面。

機側設有手機繩孔，方便掛手Snapshot之用。

另一必玩嘅係預載《Super 8》App，無論影相或拍片之後，都可揀選預設的8款Super 8菲林效果，包括Ektachrome 100D、Plus-X B&W reversal film、Tri-X B&W reversal film、Daylight 30、Kodakchrome 40、Ektachrome 160-type A、Kodakchrome II-type A及Ektachrome 64T，拍攝後用家要等待模擬嘅沖曬過程，玩過菲林機的話一定覺得好懷念。

拍攝介面簡單易用，最特別是右下角設有模式轉盤。

《Super 8》的介面模仿經典菲林機設計，過癮！

拍攝完可揀選8款Super 8菲林效果，各有特色。

十核運算效能

規格方面，Ektra的5吋全高清屏幕加入Gorilla Glass防刮玻璃，另搭載Helio X20十核心處理器、3GB RAM，並內置32GB ROM及microSD卡槽，加上支援4G制式，硬件屬於中上水平，配以Android 6.0作業系統，雖然整體屬公版設計，但廠商都落足心思，設計了一系列Kodak獨有功能，例如以不同Kodak舊機、菲林包裝設計嘅Wallpapers，另有睇相軟件《Snap Gallery》等，影友應該收貨。