葡萄牙直擊 第7代BMW 5系 智能新體驗

車廂糅合7系科技

今次廠方提供的試駕車是530d xDrive及540i，咁啱兩個版本都唔會返香港，不過唔緊要啦，新5系重點玩科技，試咩偈都唔太重要，反正都是採用BMW TwinPower Turbo，那不就是信心保證嗎？第一次坐上部車，感覺比上代豪好多，按摩椅、電子錶板及中控台觸控式屏幕當然唔少得，估唔到有埋無線充電、隔空手勢操控功能，未開車已睇到人嘩嘩聲，仲有唔知幾多個駕駛輔助系統，研究點玩、個掣喺邊都用咗唔少時間，由着車的一刻計，搞咗起碼半個鐘先駛離停車場，買咗Full Option版本的車主，睇嚟攞車時要上個堂先掂，畀咗錢又唔識用好蝕吖嘛！

540i的扭力帶相當廣，高中低轉都咁好力。	車廂布局豪華兼具科技感，錶板為全彩顯示屏。	頭部空間有所提升，乘坐感相當舒適。
杯架前方的儲物格底部裝有無線充電器，能為智能電話及Display Key充電。	按鍵啟動ACC及車道保持輔助後，可跟隨前車及保持在行車線內自動行駛。	Head-up Display的投影面積達800×400像素，較現行車款大70%。

ACC自調車速極方便

跟着BMW預設的路線駕駛，不久便駛進長約10km的跨海橋，呢段路有成七、八成直路，喺度試主動巡航控制（ACC）及車道保持輔助（Lane Control Assistant）系統就最適合啦！廠方指，選配的ACC可根據雷達數據調節巡航時的車速，而且可在車速0~210km/h之間運作，換句話說就是前面部車停，自己部車會自動跟住停，當前面部車開，自己部車又會跟住開，駕駛者唔使自己控制油門及制動。而另一項着眼於未來自動化駕駛技術的Lane Control Assistant，則是一項車道保持技術，只要馬路髹有清晰劃線，汽車便能夠自動調節轉向，並保持在行車線內行駛，配合ACC一同使用便可實現自動駕駛的效果。不過，廠方強調有關系統只是輔助性質，駕駛者仍要負起操控汽車的責任，一旦雙手長時間離開軚盤，錶板會亮起黃色軚盤的圖示，要求駕駛者放回或輕掂軚盤。不理會的話，再過一排圖示會轉為紅色，繼而發出聲響警告，防止駕駛者睡着或過於依賴。

原廠提供Bowers & Wilkins及Harman Kardon音響作選配，啱晒對音質有要求的人士。	控制恒溫系統的面板同樣是輕觸式設計，不怕入塵。	車載環視系統不但可展示鳥瞰視角，甚至可運算出車身周邊的3D環視影像。
若選配四區恒溫冷氣，後排左右冷暖都可以獨立調校。	裝上M Sport包圍的新5系，賣相極具跑格。

自動熄火整合導航

現時好多車都有Auto Start/Stop，不過唔少人都唔係咁鍾意用，嫌引擎成日又開又熄好煩，令駕駛不順暢。BMW都應該知道呢一點，因此開發新5系時特別將導航、3D鏡頭及雷達系統整合至Auto Start/Stop中，可根據識別到的交通情況避免不恰當關閉引擎，例如在迴旋處、「T」字路口等隨時要起動的地方，引擎會保持運作，確保不影響起動。同時，新5系的車載環視系統（Surround View）更昇華至另一境界，不但可展示鳥瞰視角，甚至可運算出車身周邊的3D環視影像。唔太Get到係點？睇片就明（口架）喇，正到冇朋友呀！值得一提是這個系統能夠與互聯網服務融為一體，拍攝到的影像可借助BMW Connected App顯示在用戶的智能電話上，車主即使身處海外都可隨時監控。成日去街都唔記得部車泊咗喺邊？呢個功能可能用得着。

LED尾燈組排列成廠方經典的L形設計，突出車身的寬度。	所有車都配備了Air Flap Control，需要時才會打開鬼面罩內的入氣擋板以減低風阻。	車尾手把底部有燈光點綴，每個細節都一絲不苟。

風阻系數創新低

新5系的車廂唔止High-Tech，豪華及舒適度都提升唔少，受惠於車身體積的增長，車內空間感明顯增大，頭頂空間尤為顯著，就算冇天窗都絲毫沒有侷促感。跟同車另一傳媒都認同一點，寧靜度十分出色，行駛於當風的跨海橋，風噪都可以很輕微，晚宴前問過廠方人員，新5系的風阻系數創下全世界四門車型中的新紀錄，僅Cd0.22，加上車頂嵌入了吸音板，這都是降噪關鍵。此外，對音響好有要求的車主，日後都應該唔使出街搞升級喇，Bowers & Wilkins及Harman Kardon都有得你揀，全車設有16個喇叭，前者的系統總功率更達到1,400W，於沿海山路開車聽住Underworld的Born Slippy，環迴立體的人聲再加上沉實低音，爽到核爆呀！

Display Key整合了觸控顯示屏，可顯示車輛資訊及遙控通風系統或加熱功能。	手指打圈轉便可操控娛樂系統音量，毋須按任何實體鍵或面板。	540i的制動系統提供強大的煞車效能，賦予駕駛者充足信心。

車匙顯示車輛資訊

預載於7系的語音控制亦見於全新5系，使用前毋須先設定語音指令，用平時說話的方式來表達自己的要求就可以，你可以問邊度有餐廳、點樣去？甚至操作娛樂系統，用上去有點似Apple的Siri，不過系統認識的語言冇Siri咁多，但起碼有中、英文，對大部分港人嚟講已好夠用。好多海外傳媒都話G30猶如縮小版7系，其實都不難理解，連Display Key都應用至新5系上，同級車中絕無僅有。呢條整合咗觸控顯示屏的車匙，不但可顯示車輛資訊，甚至可遙控通風系統或加熱功能，將車匙放上車載的感應式充電器便可進行無線充電。放部電話上去得唔得？得，一樣充得到。iPhone不支援呢個功能？知道吖，所以原廠會提供埋無線充電電話殼畀你，加上BMW是首間能夠將Apple CarPlay完全無線地連接到車載系統的車廠，整部車的科技感都超強，預期售價會較現行車款高，不過部車多咗咁多嘢玩，加啲價都好合理啊。

BMW 540i規格表

引擎：六汽缸BMW TwinPower Turbo

容積：2,998c.c.

最大馬力：340hp/5,500~6,500rpm

最大扭力：450Nm/1,380~5,200rpm

傳動：八前速自動波

驅動：前置引擎、後輪驅動

0~100km/h：5.1秒

綜合耗油量：6.5L/100km

二氧化碳綜合排放量：149g/km

車身體積：4,935×1,868×1,466mm（長 × 闊 × 高）

特派記者：鄭浩文

鳴謝：BMW HK

查詢電話：3129 9000