你個尾箱裝甚麼？
與朋友到停車場取車，打開揭背尾門準備將物品放進去時，他忽然「嘩！」的一聲大叫，嚇得編者個心離一離，腳震一震，手鬆一鬆，大袋小袋散落一地。
他十分稀奇地指：「10年車個尾箱點解咁『吉』咁乾淨，仲陣陣香氣好似新車咁！」編者驚魂甫定說：「有冇咁大驚小怪呀？」他立即打開自己部車的尾箱……機會來了！當然要氣運丹田兼扯高嗓門喪嗌一聲還以顏色，可惜朋友一動不動，反而感到他有莫名的羞愧感。
朋友的尾箱可謂一針都插唔入，而且一箱二箱層層疊……雖然不算得太亂，但又談不上清潔，最弊是有陣中人欲嘔的怪味。仔細一看，除了金屬工具兩大箱外，最要命還有一桶水，用途是甚麼？連他也不清楚！再看看整個車尾發覺有點墜，車頭則微微昂首，顯然尾箱物品極重。要知道尾箱不是迷你倉，更不該是惡臭難當……他說：「所以我平時很少打開尾箱的。」編者說：「斬咩腳趾避乜沙蟲，執好佢啦！」
個多星期後，朋友興高采烈地再給編者看尾箱，物品差不多清走掉，還用了香精，感覺舒服了很多。他指自從丟掉一大堆廢物後，部車好力了，就連油耗都少了。的而且確負磅重，燃油消耗會更多，所以大家不妨執拾尾箱。
講爆，今期《汽車世界》特別號內容多到爆燈，例如Mercedes-Maybach S 650 Cabriolet、Mazda3 GVC、Honda Jade RS、smart forfour BRABUS及Volkswagen雙雄。另外，Maserati產品是聖誕送禮很好的選擇，別錯過！
朱志華