城門水塘郊遊樂4K Action Cam試煉

Nikon KeyMission 170 廣角擁抱環山

去城門水塘郊遊行山，自然會見到依山傍水的風景。KeyMission 170鏡頭提供近乎魚眼的170度廣角視野，想拍攝環山抱水絕冇難度，加上機身毋須加殼都支援10米防水、2米防撞、-10℃防寒功能，就算唔小心濕咗水抑或跌落地都唔怕損壞。拍攝質素方面，它能夠拍到4K@30fps質素影片，仲內置電子減震功能，拎住邊行邊拍都能夠保持畫面穩定。而且背面設有1.5吋屏幕，另可透過Wi-Fi或藍芽連接《SnapBridge 360/170》手機App操控，將條影片即刻過落手機Share上網都掂。

售價：$3,680（KeyMission 170）、$280（AA-1B雲台）、$370（MP-AA1手柄）（a）	鏡頭擁有170度廣角視野，同時具備電子防震功能，毋須加殼都支援10米防水。	背面備有1.5吋屏幕，旁邊的實體鍵夠大粒，戴住手套都撳得到。
內置Wi-Fi和藍芽功能，底部設有NFC連接位，以手機輕拍即可連線。	試片區 170度廣角的透視感極強，不過邊位略嫌帶點變形，但兩邊樹木、中間水塘和背後山峰都盡收眼底，成像表現不俗。

規格表

解像度：最高4K@30fps（拍片）、800萬像素（影相）

鏡頭視角：170度

屏幕：1.5吋

體積：66.4×46.8×42.7mm

重量：134.5g

GoPro Hero5 Black 聲控自拍水壩

城門水塘有唔少景點，水壩絕對係自拍靚位之一，Hero5 Black特別加入聲控功能，就算一手拎行山杖，一手拎自拍棍都可Selfie，用家只要對住部機講「GoPro Start Recording」便開始拍片，講「GoPro Take a Photo」就會影相，支援英文、日文、普通話等多國語言。此外，機背具備2吋輕觸式屏幕，只要篤芒就能夠選擇設定，甚至進行曝光控制，加上唔使安裝機殼都支援10米防水，又可配對《GoPro App》以手機操控，戶外拍片冇難度。

售價：$3,200（Hero5 Black）、$640（3-Way自拍棍）（b）	聲控功能提供多個指令，做到拍片、影相、縮時攝影、切換模式等。	內建一按操控功能，關機狀態下一撳拍攝鍵即自動開機拍片。

規格表

解像度：最高4K@30fps（拍片）、1,200萬像素（影相）

鏡頭視角：沒提供

屏幕：2吋輕觸式

體積：61.7×44.4×24mm

重量：118g

ThiEYE i60+ 4倍變焦Zoom靈猴

其實除了山林、樹木、水壩之外，城門水塘另一特色係有唔少野生動物，若大家唔想走得太近拍攝的話，ThiEYE i60+擁有170度廣角鏡頭並支援4倍數碼變焦功能，Zoom埋去便可捕捉動態影像。另可配合慢鏡拍攝，不過慢鏡時畫質會由4K@30fps下調至1,080p@60fps較高格數，然後自動轉換成慢動作影片播放。機背則備有2吋屏幕作取景之用，支援以Wi-Fi配對手機App《ThiEYE》。另外跟機附有IP68防水殼，安裝後可提供40米防水、防塵和防撞效能。

售價：$1,298（ThiEYE i60+）（c）	裝上跟機的防水殼，便能做到40米防水、防塵和防撞，方便全天候拍攝。	i60+擁有超長續航力，內置電池可拍攝1,080p影片長達80分鐘。
2吋屏幕雖然唔係觸控設計，但都夠用來取景和操作。	《ThiEYE》手機App能夠實時取景操控，無論自拍或影風景都大派用場。	試片區 i60+擁有4倍數碼變焦，毋須走埋去都影到靈猴一舉一動，放大後的畫質算是不俗，亦可減低邊位變形情況。

規格表

解像度：最高4K@30fps（拍片）、1,200萬像素（影相）

鏡頭視角：170度

屏幕：2吋

體積：59×41×25mm

重量：65g

專家意見：注意畫面搖晃

在facebook開設香港風景王專頁的攝影師Jeffrey，擅長風景攝影創作，並主辦風景攝影課程，務求帶大家發掘香港鮮為人知的美麗一面。他表示：「對比傳統相機，Action Cam體積較細，電池耐用之餘，亦有廣角畫面，能夠實現第一身視角拍攝，全程記錄每個時刻。但缺點係唔可以進行光學變焦或更換鏡頭。」他建議用Action Cam遊山玩水時，先要注意安放的位置，盡量在開始拍攝前先了解畫面的實際取景角度，如果唔係有可能拍攝時會全程指向天或地。如果想拍出穩定嘅影片，可考慮選購一些內置防震功能嘅機款，或者安裝喺胸前、肩帶等位置，甚至配合電子雲台手柄來減低畫面搖晃。

撰文：黎子豪

攝影：胡振文

模特兒：Bowie

查詢電話：（a）2907 1122、（b）2950 0175、（c）2541 2982