HDR、4K畫質升級Xbox One S蓄細待發

體積縮減四成

Xbox One S各方面都有大幅改進，尤其係外形上變得更細小，拍埋去上代Xbox One比較足足細四成，擺喺客廳或房間打機夠晒慳位，加上內置火牛和1TB容量，一插電源線和HDMI 2.2接駁線就即刻玩到，跟機仲會有隻《Battlefield 1》或《FIFA 17》下載版，輸入背面個編碼即可入Game。至於手掣唔單止更好手感，無線覆蓋範圍增加至兩倍，加上新增藍芽功能，方便配對《Windows 10》電腦打機。

HDR質感盡現

今次Xbox One S特點之一係植入咗HDR高動態技術，提升光暗對比度和色彩更豐富，大前提係你部電視需要支援HDR 10技術先用得到。首先試玩第三身射擊遊戲《Gear of War 4》，開啟HDR的畫面中，戰甲和槍械呈現出強烈嘅金屬質感，仲展現戰損嘅細節，加上近景和遠景夠細膩，同時帶出遊戲的視角深度。再試賽車遊戲《Forza Horizon 3》，賽車造型夠逼真之餘，車身嘅反光位亦會因環境變化，天空和兩旁嘅景物富有層次感，加上整體畫面流麗，猶如駕駛真實賽車。

背面取消了Kinect接口，不過設有HDMI輸入輸出、USB 3.0、IR、S/PDIF、網絡接口。	白色機身嘅Xbox One S，Size比上代收身近40%。	Xbox One S本身已經內建火牛，跟機會有手掣、電源線、HDMI線，另外仲會有隻《Battlefield 1》或《FIFA 17》下載版。

兼容4K播放

主打靚畫質嘅Xbox One S甚至擁有4K Upscale技術，有效將非4K內容升級至4K畫面，任何畫面都會變成高質影像，加上新機支援4K Ultra HD Blu-ray影碟播放，以及4K視頻串流睇片，就算唔打機都可以當4K Blu-ray播放器用。今次就試播新到嘅《天煞地球反擊戰：復甦紀元》4K Blu-ray，與外星人交戰的一幕，可以見到戰機上暗位部分清晰展現，而且人物膚色和臉上細節忠實還原，畫質上比一般Blu-ray實淨得多。

由於新機支援HDR技術，從《Gear of War 4》遊戲中嘅戰甲和槍械展現金屬質感，遠處的景物和敵人同樣清晰可見。	《Forza Horizon 3》流暢度高唔會窒格，而且車身逼真，反光位會隨環境變化，樹林和天空亦富有層次感。	試播《天煞地球反擊戰：復甦紀元》4K Blu-ray，戰機上和背景嘅黑位實淨，尤其是細節部分都睇得一清二楚。

撰文：黎子豪

攝影：胡振文

場地提供：米樂影音

查詢：（a）www.xbox.com/zh-HK、（b）2787 0678