金黃芒草5招必攝技

每逢秋冬時分,都係觀賞芒草嘅最佳季節,而且近年來影芒草仲成為香港人熱門的戶外活動,既可以行山呼吸新鮮空氣,又影到靚相,今次就搵嚟拎過國際攝影獎項嘅攝影達人Kelvin Yuen,過幾招芒草拍攝技巧畀大家,想影靚相記得留意。

第1招:背光凸顯意境

影芒草若果要展現出意境,就要注意採光和環境,Kelvin指:「最理想就係使用背光嘅採光方法,然後相機再加一至兩級曝光,咁影出嚟嘅畫面會比較柔和,而且會有金黃色嘅光邊凸顯一條條嘅芒草。若果使用正光拍攝,雖然能夠展現出芒草的層次感,但由於光線比較均勻,沒有太大的變化,因此在構圖上要有鋪排。」

第2招:人像拍攝 善用色彩對比

唔少人去影芒草都會三五知己一齊上山,假如要配合人像拍攝,就要從服飾方面着手,Kelvin稱:「始終芒草嘅色調都係一片金黃,假如想突出人物主體的話,就建議穿着紅、綠呢類鮮色嘅衫,透過顏色嘅強烈對比,讓焦點集中在主體身上。若然要表現出環境嘅和諧性,主體則可穿上灰、白淺色衫,令人物融入芒草嘅環境之中,冇任何違和感。」

第3招:長焦距呈現密集性

既然要行上山影芒草,就唔會出動所有鏡頭,必定要審慎選取器材,Kelvin強調:「其實每支鏡頭都有唔同特性,我自己就會帶50mm F1.8大光圈鏡頭和70~200mm長焦鏡頭,前者能營造淺景深效果,從而突出主體;至於後者可表現出強烈嘅壓縮感,就算山上芒草稀疏,用長焦鏡影出嚟感覺會變得好密集。另外我亦都會用16~35mm廣角鏡影,利用透視感記錄廣闊嘅環境。」

第4招:留意天氣條件

事實上影芒草都要夾天氣和時間,皆因若然濕度太高,芒草就會聚集在一團,Kelvin解釋:「適逢呢幾日冷鋒殺到,相對濕度會較高,等冷鋒過後天氣會變得乾燥,芒草就會自然散開,影出嚟嘅畫面會靚好多。至於拍攝時間最好喺日落時間,太陽光照射出金黃色光線,不過建議在日落前一個鐘到達目的地,以便準備位置、構圖、方向,咁就唔會手忙腳亂。」

第5招:慎選地點 量力而為

芒草並唔係咩稀有植物,香港唔少地方睇得到,例如飛鵝山、大東山、大帽山、馬鞍山等,分別在於芒草嘅密集程度,以及地點便利性,Kelvin表示:「要數交通最方便肯定係飛鵝山,自駕沿飛鵝山道就到達東面,再行5分鐘就會抵達目的地。但係芒草最密集非大東山莫屬,而且有獨特嘅爛頭營襯托,但無論邊條路線上山都有一定難度,要量力而為。」

Kelvin Yuen小檔案

經常到訪香港大大小小山頭拍攝不一樣的香港,早前憑藉於飛鵝山拍攝的相片,於「2015國家地理攝影大賽」中獲得了青年組冠軍及佳作獎項,現在更擔任香港旅遊發展局「Great Outdoors Hong Kong 2016-2017」攝影顧問。另外,亦有跟德國國家旅遊局、National Geographic及不同大型品牌合作。

撰文:黎子豪

相片:由受訪者提供