一枱朋友，說起政情，不無長嗟短嘆，就在最低處之時，忽然有人提起「楊岳橋」三個字，氣氛立即變得積極，情緒立即得以高升。
女人A說：「『岳少』真係好叻！」女人B說：「『岳少』仲算幾好樣！」並非女人的我說：「相比議會裏面嗰班核突佬核突婆，『岳少』當然係非常之好樣啦！」
平時非常冷靜的女人D，也忍不住發表意見：「呢種有學歷、有知識、人又正義、仲好有風度同幽默感嘅男人……」此時她頓了一頓，煞有介事地擰個頭對我說：「你都係你都係……」以完美的公關姿態頒完「安慰獎」之後，繼續發表她最重要的看法：「如果我要搵女婿，一定指定要『岳少』！」
全場靜了半晌，然後爆發笑聲。女人B大叫：「你個女好似仲未夠10歲喎！」女人A插嘴：「煲得嚟都差唔多啦！你諗吓過多10年，佢個女就20歲，『岳少』就45歲，咁都算好匹配！」是的，在現今社會，一個美麗的20歲年輕女子，跟一個事業有成的40多歲中年男人，是多麼的匹配。
此時女人D又再補充：「你哋都知啦，品格好、幽默又有風度嘅男人，喺香港真係絕冇僅有。」相信很多女士都有同感，香港的男人不是太嚴肅太剛烈，就是流於硬滑稽愛吹水，或者太小家敗氣，只愛炫耀自己有多威風，稍為被挑戰時就醜態盡露。「岳少」的態度，或者值得各位男士取經。
網址：www.chan-wai.com