上山下海情侶相放閃Like爆
好多情侶都鍾意將拍拖相Up去facebook或IG同朋友Share吓，但如果張張相都係Blur晒個背景，又或者吓吓用手機自拍得番個大頭，明星咁嘅樣都睇到厭啦！想呃Like不如玩大啲，索性同另一半登山遠足，順便從另一角度拍攝美麗的香港。唔識路？唔緊要，今次搵嚟近排在網上人氣急升的風景攝影師Zachary Law醒幾個靚景畀你，想影幾閃幾爆的靚相都冇難度啦！但前提係，你要有個……
天文知識不可忽略
當你以為萬事俱備，有個願意陪你行山的另一半、有齊攝影架生，對影相又有啲研究，但咁樣都唔代表你一定可影到靚相o架喎，Zachary話要增加成功率，有少少天文知識就更好，譬如銀河喺哪邊升起、幾點升起等等，仲要知道雲量、區域能見度、風向及風速先可以決定去邊度影，唔好話貪方便是但搵個地方，咁樣好大機會「食白果」，仲要嘥埋時間及體力。現時，不少手機App都有提供相關資訊，好似《Sky Map》、《Sky Walk - Astronomy》、《Sun Surveyor》及《Sun Position》等都係好幫手，計算好晒方位及時間先出發，影到靚相的機會自然大好多。
大東山─金黃芒草
路線：伯公坳起步，沿鳳凰徑至梅窩終點
距離：約8公里
難度：3（以5為最難）
題材：芒草、銀河、雲海
建議：
◎拍攝芒草的最佳日子為11月至12月，時間最好是日落前個半小時，斜陽照射到芒草會有金黃色效果。大東山的芒草較密集，比較易影，但切記不要攀上石屋頂取景，屋頂負重隨時有倒塌危險，仲有唔好踐踏芒草，破壞大自然。
◎銀河必須在天色極佳、沒有雲的日子拍攝，水域能見度最少30公里以上，拍攝銀河最佳月份是2月至9月。由於銀河在東南方升、西南西方落，因此拍攝時要向日出方向影，銀河出現的位置及時間會受不同月份及時間而改變，今個月銀河中心出現時間為晚上7時左右。
◎雲海在濕度高的日子較易出現，因此春天是影雲海的最佳季節。
菠蘿山+下白泥─驚喜Magic Hour
路線：屯門良景邨起步，沿良俊樓對開之登山步道至下白泥
距離：約6公里
難度：2
題材：日落、峽谷
建議：
◎日落後的1小時是最靚的時間，稱為Magic Hour，常有意想不到的驚喜。正因為太陽接近地平線，大量藍光會被散射掉，讓天空呈現橙紅色，有雲的日子更佳。
◎拍攝峽谷時不要站近崖邊，免生意外。
烏溪沙石灘─逆光晚霞
路線：烏溪沙石灘
距離：港鐵馬鞍山站或直接乘車前往
難度：1
題材：日落、晚霞
建議：
◎情侶利用逆光拍攝，會有種溫暖的感覺。
◎如果在心形石合照，盡量使用高角度拍攝，可達致人景合一的效果。
飛鵝山自殺崖─震撼夜景
路線：沿飛鵝山道上山，過了百花林路分岔位再前行約800米，左轉沿石級上山至發射站，再向南行便是自殺崖。
距離：約5公里（來回）
難度：5
題材：斜陽、夜景
建議：
◎拍攝夜景要在能見度高的日子。
◎登自殺崖除可經較易行的百花林外，還有多條路線可揀，當中南脊路徑尤為險要，不建議取此路。另外，落雨或潮濕日子也不要嘗試登山，大石表面會變得非常濕滑，必須注意安全。
浪茄─如鏡倒影
路線：北潭涌起步，沿麥理浩徑至浪茄
距離：11公里
難度：1
題材：日出、銀河
建議：
◎途經萬宜東壩及西壩都可拍到如鏡般的水塘，不過現場環境絕不能大風，否則水面會出現波紋。
◎拍攝銀河需要長時間曝光，唔想個人影出來矇查查，必須企到定一定，必要時可短暫閉氣。
小貼士：腳架要具分量
登山遠足本身都要花一定體力，再孭埋一大堆攝影器材，都真係唔簡單。Zachary話，登山前要計劃好拍攝題材，才決定帶哪些器材，若明知只會影Wide Shot，就無必要帶長鏡，夏天負重登山都幾辛苦。不過，腳架卻不能選擇最輕的款式，因山上往往較大風，當相片需要長時間曝光時，一支有「分量」的腳架可減少出現鬆郁矇的情況，若有埋掛袋鈎可令腳架負重就更佳。他又提醒遠足人士要愛護大自然，不要喧嘩及留下任何垃圾，登山亦要量力而為，出發前一定要睇天氣預報，仲要帶夠糧水、保暖衣物及小型急救包，做個有責任的人，男仔最好就幫女友帶埋防曬及蚊怕水啦。
攝影達人Profile：
Zachary Law，80後業餘風景攝影師。最初從行山、露營中喜歡了大自然，於是用相機記錄下來，後來對相片質素的要求愈來愈高，還加入攝影會及主動請教攝影師，經過2年不斷的苦練，終有今日成果。
撰文：鄭浩文
相片提供：Zachary Law
IG：zachary_lcm
FB：https://www.facebook.com/ZacharyLandscapes/