至尊狂迷細數潮牌威水聯乘
Supreme歷年來與數之不盡的潮流單位聯乘合作，而當中最門當戶對的都應該係板鞋品牌Vans，兩者惺惺相惜十多年，每季最少有三五次合作，由2006年至2016年10年間至少「握手」合作超過50次。以2014年為例更試過5度聯乘，所以話Supreme鞋款就等於Vans真係絕不為過。是次，藉着最新一回Supreme × Vans聯乘系列上架，特別邀請城中Supreme狂迷兼「鴛鴦鞋控」咸旦對談，由佢分享個人收藏Supreme ×Vans的經驗，順便回顧過往10年兩個單位的經典設計。
惺惺相惜 關係密切
早前，曾經有外國潮網挑選20件於1994年至2014年20年間推出的Supreme最佳單品，當中Vans出品就分別佔了3個席位，分別係1996年推出的Supreme ×Vans Old Skool Camo、2012年由滑板手Steve Caballero親自操「刀」剪筒僅限量發售20對的Supreme × Vans Half Cab Duct Tape及2013年推出以樂隊New Order唱片封套《Power Corruption Lies》為靈感的Supreme × Vans「PCL」，由此可見Supreme與Vans的關係絕對密切。
最新合作 三色格紋
多年來，Supreme × Vans聯乘最常用的鞋款是Authentic、Era、Old Skool、Chukka、Half Cab及SK8-Hi，基本上每次合作都必定有其中一款登場。當中的SK8-Hi更是出鏡率最高一款；相反Slip On只曾於2015年4月於White Castle × Supreme × Vans三方聯乘系列中曇花一現。今回，最新推出的Supreme × Vans鞋款分別為SK8-Hi Pro及Authentic Pro，分別推出紅、藍及黑三色，而鞋身上的格紋就暗藏品牌字樣，但因為白色字體「黐地」關係就令設計變成「Su me」，有理由相信是刻意向當年老翻「Su me」Box Tee「反致敬」。
與咸旦對話
Q1：咁多年以來邊對設計令你印象最深刻?
A：如果無記錯我第一對入手的Supreme × Vans應該係2007年款，但最鍾意的聯乘就係Supreme × Vans「PCL」，因它以當年Peter Saville為New Order設計《Power Corruption & Lies》唱片封套的花花圖案做Print，而系列除咗有Vans Era、Chukka、SK-8外，更有Bucket Hat、Hoodie、Pocket Tee及Shorts，整個Collection非常完整。
Q2：可否介紹一些你個人的Supreme × Vans珍藏？
A：其實都唔算係珍藏，我覺得鍾意Vans的朋友都會有好多不同原因，尤其是買鞋，而點解我會買Campbell's Soup × Supreme × Vans？係因為我好鍾意Andy Warhol，雖然知道呢對鞋唔係同Andy Warhol合作，但見到個Campbell's Soup圖案一樣想買。另外，COMME des GARÇONS SHIRT × Supreme × Vans第1次合作系列我都好喜歡，藍色條子設計斯文得嚟又有板味，仲可以襯埋同系列襯衫。還有一對較早期的Supreme × Vans Old Skool都好喜歡，因為分別用了麖皮與皮革打造鞋身，後踭部分更配上Natural Leather，依家我好想買番齊色，但應該好難了。
Q3：覺得最新一回Supreme × Vans設計怎樣？
A：作為Supreme一個Die Hard Fan，我覺得呢對係Supreme × Vans的代表作，因為Vans自己的Checker是最經典和歷史悠久的設計，而Supreme更巧妙地將自己Logo隱藏於Checker中，所以我個人認為呢對會係名留青史的經典設計。
Q4：你最希望Supreme × Vans推出怎麼樣的設計？
A：我希望Supreme ×Vans可以推出一款內籠有毛毛的設計，供寒冷時穿着，或者推出比Half Cab更高筒的Full Cab版本，因為Kanye West曾經着過Full Cab，希望Supreme老闆James Jebbia真係聽我講啦！
兩大品牌「交叉」回顧
•2006年9月：推出Ari Marcopoulos × Supreme × Vans SK 8，同系列還有Era型號，同樣以攝影師Ari Marcopoulos黑白照片作設計。
•2012年5月：推出Campbell's Soup × Supreme × Vans，整個系列共有Authentic、Half Cab、SK8-Hi三個型號、Tee及Snapback。
•2012年：由滑板手Steve Caballero親自操「刀」剪筒僅限量發售20對的Supreme × Vans Half Cab Duct Tape。
•2013年3月：推出Supreme × Vans Era「PCL」，設計靈感來自Peter Saville為New Order《Power Corruption & Lies》所設計的花花唱片封套，整個系列共有Chukka、SK8-Hi及Era三個鞋款，同時還推出Bucket Hat、Pocket Tee、Hoodie及Sweat Shorts。
•2013年6月：COMME des GARÇONS SHIRT × Supreme × Vans再度合作，並以數碼迷彩打造出兩款Era及兩款Half Cab。
•2014年3月：Playboy × Supreme × Vans打造出1款4色的Authentic及SK8-Hi。
•2014年6月：COMME des GARÇONS SHIRT × Supreme × Vans第3次合作，以紅黑雙色條子及波點打造作品，當中SK8-Hi一款鞋側更印上已故滑板手Harold Hunter肖像。
•去年4月：為美國連鎖快餐店推出White Castle × Supreme × Vans三方聯乘鞋款，當中分別有Slip On、Authentic及SK8-Hi。
同場加映：Supreme秋冬新品
撰文：賴文曦
攝影：莫文俊
查詢電話：2608 4166