Moto Z 4大模組秒速變身

每個人對手機都有唔同要求，有人着重拍攝質素，有人追求玩味功能，點樣先可以滿足晒班「奄尖」玩家？答案就係Motorola新推出嘅Moto Z系列手機，首度支援Moto Mods模組，想將手機變成哈蘇相機影相，抑或變成投影機玩流動影院，將機背一啪模組就搞掂，想點玩就點玩！

售價：$4,999（Moto Z）、$4,099（Moto Z Play）、$3,399（Hasselblad True Zoom模組）、$999（JBL SoundBoost模組）、$2,599（Moto Insta-Share Projector模組暫定11月推出）、$899（Incipio Offgrid模組）

5.15mm纖薄設計

Motorola手機業務自從被Lenovo收購之後，愈搞愈多花臣，像今次Moto Z用上鋁合金加不銹鋼物料製造，外形硬朗實淨，但機身厚度只得5.15mm，甚有當年風靡全球嘅RAZR影子。機身仲加入防水塗層，簡單做到生活防水效能。值得留意是，新機不設3.5mm耳機插口，用家需透過附送的USB Type-C 3.5mm轉插才能接駁傳統耳機，對於鍾意四圍聽歌睇片嘅用家，可能會冇咁方便。

機面下方設有指紋辨識器，奇怪是沒有兼備Home鍵功能。	金屬物料機背加上拋光效果，還植入1,300萬像素鏡頭。	模組均設有接點，只要對準機背一啪即可使用。
Moto Z機身僅厚5.15mm，惟鏡頭部分凸出，小心刮花。	一如其他Moto手機，介面與原生Android相似，預載小量第三方軟件。	支援一系列手勢操作，例如晃動手腕兩次就會開啟相機。

名廠相機專用介面

新機最大賣點是支援Moto Mods模組，機背下方特設磁石接點，用家只要將模組對準接點一啪即可結合，玩落好似安裝手機殼咁簡單，而且毋須事前熄機，吸實後又唔會移位，一啪便可啟動模組功能。現備有4款模組供選購，當中設計較簡單的Incipio Offgrid，提供額外2,220mAh電量，免除外接尿袋的麻煩。而JBL SoundBoost喇叭內置兩個27mm單元及1,000mAh電池，可將手機音色即時提升。Moto Insta-Share Projector則可投影出70吋畫面，同時內置1,000mAh電池，將手機變成流動投影機。而小記最Like嘅係Hasselblad True Zoom，有相機名廠哈蘇加持，提供10倍光學變焦及Xenon閃光燈，相機手柄仲有快門鍵、變焦拉桿及獨立開關鍵；連接模組後即可進入專用相機介面，玩盡JPEG彩色、JPEG黑白、RAW+JPEG彩色3個拍攝模式，以及運動、夜景、自動等場景，十足一部數碼相機。

旗艦機王規格

規格方面亦屬機王級數，5.5吋2,560×1,440解像度屏幕、Qualcomm Snapdragon 820處理器及4GB RAM，多工作業應付自如。另植入1,300萬像素主鏡頭，支援光學防手震及雷射自動對焦技術，拍攝質素不俗。其實廠方同期還有一款手機名為Moto Z Play，兩機嘅外觀和設計相似，同樣可加裝Moto Mods模組，最大分別是厚度由5.15mm增至7mm，而且屏幕解像度、處理器、記憶體規格亦有所下調，只係電量提升至3,510mAh，令續航力提升。

Moto Mods模組睇真啲

Hasselblad True Zoom提供10倍光學變焦及Xenon閃光燈，設計專業。	裝上Hasselblad True Zoom模組後，可用到專屬拍攝介面。	JBL SoundBoost整個背面均為喇叭，並提供小支架作座枱之用。
連接模組後即可啟動相關功能，好似JBL SoundBoost會提升音效輸出。	Incipio Offgrid嘅功能最簡單，提供2,220mAh額外電量。	內置電池的不同模組，皆會即時為手機充電。
Moto Insta-Share Projector大玩投影功能，同時提供座枱支架。	雖然機身細細，但實試投影嘅畫質都幾清晰。