Hero5系列防水拍片4K「講」究

愈來愈多人鍾意用Action Cam運動相機拍片，不過任你拍得幾叻都好，始終都要動手按開關或者用手機App操控。不過剛抵港嘅新一代GoPro，當中Hero5 Black和Hero5 Session都新增咗語音控制功能，換言之開口講句嘢即可拍片，以後玩Action Cam使乜出手咁麻煩！

（左）Hero5 Black 售價：$3,200、（右）Hero5 Session 售價：$2,550

聲控支援多國語言

新一代GoPro最好玩係加入語音控制功能，支援英文、日文、普通話等多國語言，例如用英文講「GoPro Start Recording」就會開始拍片、講「GoPro Take a Photo」則會影相，連停止拍片、縮時拍攝指令都辨識得到。好處是當玩家進行戶外活動時，唔使再騰出雙手去撳掣。不過語音控制都有少少規限，例如距離太遠或者環境太嘈都會冇反應，而且認唔到廣東話，期望日後有更新啦！

新GoPro備有Hero5 Black及Hero5 Session版本，沒有上代的Silver版。

新GoPro備有Hero5 Black及Hero5 Session版本，沒有上代的Silver版。

語音控制支援英文、日文、普通話等多國語言，可惜未有廣東話。

Hero5 Black唔單止影到1,200萬像素相片，仲支援RAW格式。

10米裸機防水

有玩過GoPro的用家，都知佢每逢落水都要加個防水殼，笠住個殼收音自然冇咁好。Hero5系列終於毋須加殼，裸機下都可做到10米防水效能，機身表面改用橡膠物料之餘，亦多咗凹凸坑紋以防跣手；若果需要潛到更深水嘅地方拍攝，就需要另購專用防水殼。為迎合用家對質素的要求，Hero5 Black和Hero5 Session均提供4K@30fps拍片質素，最大分別是前者影到1,200萬像素相片，後者可拍攝1,000萬像素相片。

Hero5系列毋須加裝防水殼便可裸機掟落水。

機身支援10米防水，USB插口、電池位置都加入防水軟膠。

2吋觸控屏幕

上代GoPro有分開Black和Silver版本，不過新一代刪除了Silver版，皆因Black版的背面已植入2吋觸控屏幕，能夠直接篤芒操作和測光取景，另提供GPS定位系統及RAW格式影相。至於外形四方嘅Hero5 Session，機身更加輕巧簡約，主要以頂部細小嘅液晶屏幕顯示拍攝資訊，若果要取景就必須以Wi-Fi或藍芽連接《GoPro App》手機應用程式。