玩‧瞓‧扮‧煮騎呢Party Room提案

10月有唔少假期，係一大班朋友聚會嘅好時機。不過搞聚會最頭痕就係冇場地，所以近年Party Room開到成行成市，當中有唔少騎呢之選，好似喺火炭嘅Journey Party，引進4人氣墊球機、8人手足球機以及NBA籃球機等，十足小朋友樂園咁款。另有Party Room玩吊床鬥Hea、扮課室可玩易服Cosplay，甚至玩樓上煮飯仔，總有一款啱各位要求。

氣墊球機由美國空運到港，可4人同場互片，Size比坊間機款更大。

大型氣墊球機 4人較量

位於火炭嘅新場Journey Party，佔地約2,000呎。佢同一般Party Room唔同嘅地方，係引進多款大型遊戲，當中包括可4人互片嘅氣墊球機Galaxy Collision Quad Air Hockey Table，可以同時放兩三塊氣墊球嚟個大混戰，攻守節奏比坊間嘅長形氣墊球機更快，而且玩家輸晒5條命之後，龍門會自動閂閘。鍾意一班人落場玩嘅話，另推介由意大利引入嘅Roberto Sport College Foosball Table手足球機，Size比傳統機款更大，可供8人以4 Vs 4互片，講求合作性！

氣墊球機預設每位玩家有5條命，死晒後龍門就會閂閘。

一大一細嘅籃球機，大人細路都啱玩。

籃球機可以加入NBA球星卡，只要將球星卡放入卡槽便可發動技能。

NBA籃球機插卡加Fun

除咗手足球機，自然要講埋籃球機，Party Room提供一大一細獲NBA授權嘅籃球機，投籃時可加入NBA球星卡發動不同技能，例如加時、加分等，令遊戲更加好玩。此外，唔少Party Room都提供桌球枱，不過Size大多唔合標準，場內遂引進英國Riley Ray Pool Table桌球枱，黑色絨面及銀色枱腳，配合專用桌球燈，鍾意篤波嘅玩家定能盡情發揮。