點評iPhone7麥玲玲怕污糟 方健儀讚型
果粉勁期待嘅iPhone 7昨天正式開賣，無論閣下訂唔訂到，相信大家對新iPhone嘅亮黑新色、雙鏡拍攝及聽歌質素等都相當好奇。小記今次搵嚟城中幾位知名「果粉」試機，睇吓佢哋點樣評價！
堪輿學家麥玲玲：「最衰冇咗3.5mm介面！」
雖然iPhone 7系列嘅屏幕尺寸及解像度不變，但亮度比上代提高咗25%。大細iPhone 6s都有用嘅堪輿學家麥玲玲，大讚iPhone 7 Plus嘅屏幕質素：「新機個芒好靚，而且靈敏度高，單手捽一捽畫面就做到10倍Zoom，方便我影風景。可惜亮黑色太易污糟，後生仔可能鍾意，我就依舊鍾意玫塊金色！」對於新機取消了3.5mm介面，師傅就唔多Like：「雖然我平時唔太聽歌，但會用耳機插來掛犯太歲吊飾，依家冇咗好唔方便。」
前主播方健儀：「亮黑夠型，襯我！」
iPhone 7共有5隻顏色，分別是金、銀、玫瑰金，以及新增的啞黑及亮黑色。方健儀第一眼見到亮黑色就話靚：「我喜愛Cool一點嘅顏色，所以亮黑色幾適合我。不過部機好易印到手指模，我個人比較懶，要日日抹一定唔得，若我買咗會加番個透明殼。」iPhone 7另一賣點是Home鍵改用Taptic Engine壓力式感應，方健儀用落就唔係好慣：「初按下去時好似無反應，原來大力少少就會感覺到個面板向下壓。我覺得呢個係德政，皆因以前試過壞咗Home掣，依家粒掣唔再入塵，自然冇咁易壞！」
人氣模特兒Kimi：「自拍連髮絲都影到！」
女生愛自拍，iPhone 7個前置FaceTime HD鏡頭升呢至700萬像素，人氣模特兒Kimi表示：「自拍鏡頭比之前細緻啲，睇到頭髮係一絲絲，顏色相對真實一點。我反而想知iPhone 7 Plus個淺景深功能幾時有得玩，相片前清後矇，保證影到我靚一靚！」
DCFever總編輯Jeffrey：「雙鏡微距好犀利！」
iPhone 7 Plus內置兩組1,200萬像素鏡頭，除了變焦勁，成像質素仲唔錯，攝影達人Jeffrey表示：「剛剛喺室內環境試咗幾張相，初步看來顏色表現、白平衡都相當準確。微距功能亦好犀利，尤其係佢嘅長焦鏡頭，將主體放得好大好明顯，暗位沒有因為Noise Reduction而令細節消失。」
耳機專家Cato：「Lightning耳機好聽一點。」
iPhone 7改用全新Lightning耳機，「金耳朵」Cato測試後表示：「新耳機同原有3.5mm版好接近，要聽到好細微嘅地方，好似呼吸聲、咬字聲或低音大提琴撥弦等，先聽到新耳機立體一點、好聽一點。至於個3.5mm轉插線，安裝後音質同以往分別不大，若有用開3.5mm耳機的話，不妨用住先。」
撰文：陳志滔
部分攝影：莫文俊