Choco搶試Marshall手機Rock得起

串流音樂平台如KKBOX、JOOX等大行其道，人人用手機聽歌。不過由你戴上耳機一刻，無論首歌幾好聽都變成「獨家村」，為此結他Amp老牌Marshall推出智能手機London，竟植入雙前置喇叭及兩組3.5mm耳機插口，加埋專用混音及錄音App，女子唱作樂隊Choco試過後大讚：「手機都Rock得起！」

左起為Nova、Kiki、Cathy、Mel<br>Choco試聽後大讚Marshall London音色靚，功能仲好適合音樂人。

左起為Nova、Kiki、Cathy、Mel
Choco試聽後大讚Marshall London音色靚，功能仲好適合音樂人。

經典皮革外形

英國結他Amp老牌Marshall嘅粉絲眾多，近年還推出耳機、藍芽喇叭等Gadgets。原來Choco主音Mel都係佢嘅粉絲，甫看到London手機已話好靚。「我鍾意設計獨特嘅手機，London以人造皮革包覆，外表似足Marshall啲皮紋喇叭，而金色音量轉盤手感又似喇叭旋鈕，夠晒經典！」機背及電池更分別印有Marshall Logo及Long Live Rock 'N' Roll標語，一拎上手已知閣下係Band友。

售價：$5,599

機頂設有金黃色按鍵，一按即進入音樂播放介面，左右兩旁各有一組3.5mm耳機插口。

機頂設有金黃色按鍵，一按即進入音樂播放介面，左右兩旁各有一組3.5mm耳機插口。

機背印有Marshall標誌，並設有800萬像素鏡頭及補光燈。

兩組耳機插口

潮流興分享，新機另一賣點係「起孖」，前置兩組立體聲喇叭之餘，還加入兩組3.5mm耳機插口，變相可同時插入兩隻耳機聽歌。低音結他手Cathy試聽後表示：「兩組喇叭備有環迴立體聲，開到最大聲都冇爆音，啱晒我哋錄完歌一齊聽番！」鼓手Kiki補充，跟機送的入耳式耳機平時要畀錢買，音色絕非其他濫竽充數的耳機可比，「最估唔到係佢送埋塊Pick，表面打咗窿可充當手機掛飾，仲可以用嚟彈結他！」

附送同廠耳機，街價接近千元，音質絕非等閒貨色可比。

附送結他Pick表面有仿皮紋，貫徹搖滾風格。

《edjing London》可匯入MP3檔案，做到即時混音效果。

四軌錄歌App

作為音樂手機，硬件方面用上Snapdragon 410處理器、2GB RAM及4.7吋720p屏幕，不過主鏡頭只有800萬像素，影相效果只屬一般！幸好，此機內建Wolfson WM8281 Audio Hub獨立音效晶片，同時支援FLAC等無損音樂格式，保證聽出耳油！預載Apps同樣走音樂路線，包括捽碟用的《edjing London》、可校EQ值的《Marshall Button》及音樂遊戲《Rockabilly Bros》等，結他手Nova就推介《LoopStack》，「平時手機只能錄一條聲軌，但呢個App可錄4條Tracks，音質仲有16-bit 44kHz，隨時錄歌都冇問題。」