Pokemon GO內外夾攻！日夜鍛煉去取勝

5大稀有精靈出沒地

玩咗幾日《Pokémon GO》，小記同各位一樣捉到過半數品種嘅精靈，不過愈後期先至愈地獄，皆因稀有精靈唔係度度有，好彩有外國網站PokéVision幫手，不僅可透過Google Maps顯示精靈位置，甚至會Live Time話你知精靈仲有幾耐出沒。以下推介5大稀有精靈，當中號稱現時攻擊力最高嘅啟暴龍（149號），可以喺油尖旺一帶搵到；另外肥嘟嘟嘅卡比獸（143號），經常喺將軍澳出沒；還有水及冰屬性嘅背背龍（131號），有機會在元朗和天水圍附近捉到；至於火屬性兼擁有高攻擊力嘅鴨嘴火龍（126號），在灣仔會見到佢嘅身影；當然唔少得亞洲限定嘅火葱鴨（83號），在沙田會較易遇到。不過呢幾隻稀有精靈唔會固定喺一個區域，所以記得定Check住PokéVision網站。

千人聚集點「升呢」

捉咗稀有精靈梗係要「升呢」打道館，唔少人都知道公園係最多PokéStop嘅地方，只要有人撒櫻（Lure Module），就會吸引好多精靈自投羅網，同時吸引到好多人嚟黐餐。香港較多人聚集嘅地方如天水圍天秀路公園，此處有齊道館和PokéStop，高峰期有過千人聚集；而銅鑼灣維園內有超過20個PokéStop，屯門公園亦有連續嘅PokéStop，吸引民眾刷道具和精靈蛋。

放大圖片	天水圍天秀路公園係捉精靈集中地，晚上經常有過百人聚集。	10km精靈蛋都唔算難孵，坐電車已加了不少步距。

孵蛋唔使靠對腳

提起精靈蛋，好多人都知分為2km、5km及10km三種，要透過手機計算步距來孵蛋，當中以長距離嘅10km最珍貴，建議好似小記咁超過Level 17才孵化，有機會得到高CP的稀有精靈。另一孵蛋要訣是速度唔超過20km/h才會計入步距，換言之搭港鐵、巴士等都唔算數，建議乘搭電車之類嘅交通工具。如果坐定定喺屋企的話，網上有人試過將手機擺喺玩具火車、自動吸塵機等畀佢通屋走，都可以成功孵蛋。

PokéVision網站會喺地圖顯示精靈嘅出沒位置，仲會提供現身時間。網址：www.pokevision.com

Android「訓練員」必裝《PokeDetector》免費工具，附近有精靈即會通知大家。

捉精靈拎着數

唔好以為《Pokémon GO》淨係捉精靈升呢打道館咁簡單，其實唔少商場和店舖都大搞推廣。好似帝京酒店推出Tips & Treats活動，會喺酒店嘅PokéStop為住客撒櫻吸引精靈，不過最爆係捉到大鉗蟹（98號），加上CP值超過100，就可以88折優惠享用帝京軒「極品蟹盛宴」。此外，東港城、wtc more世貿中心、上水廣場、Mikiki、將軍澳中心、新城市廣場、YOHO MALL形點、MOKO新世紀廣場、荃灣廣場、新都會廣場、新達廣場、荷里活廣場等，都會喺場內嘅PokéStop在指定日子定時撒櫻吸引人流，有些仲可購物或玩遊戲換領現金券，喺街玩到身水身汗，入去商場過冷河兼捉精靈，其實真係幾爽。

帝京酒店會喺PokéStop為住客於指定時間撒櫻來吸引精靈。 查詢電話：2622 6110

只要捉到CP 100以上嘅大鉗蟹（98號），就可於帝京軒以優惠價食「極品蟹盛宴」。 查詢電話：2622 6161

1 .擁有水及冰屬性嘅背背龍（131號），經常在天水圍一帶出沒。

2 .遊戲中最高攻擊力嘅啟暴龍（149號），在油尖旺會見到佢嘅蹤迹。

3 .火屬性嘅鴨嘴火龍（126號），有機會喺灣仔捉到佢。

4 .火葱鴨（83號）為亞洲限定，CP唔算好勁，適合作收藏之用。

5 .將軍澳會容易見到卡比獸（143號），可愛之餘仲好好打。

撰文：黎子豪