籃神坐鎮 球迷奇遇記

超像真1：1雕像

話說今期Hysan Place與利舞臺一帶舉行以籃球作主題嘅大型Party—「Greatest Of All Time@Lee Gardens」，有展品、有遊戲仲有嘢賣，焦點之一就係4座1：1真人原大嘅籃神雕像，「選材」正正係MJ、Kobe與Curry，由於Kobe今年退役，大會為咗向佢致敬，4座雕像中，Kobe獨佔其二。1：1雕像由本地知名Figure品牌Enterbay打造，花咗超過300小時製作而成，難怪由面相到身形都似到足，而且雕像身上嘅波衫、波鞋都係實物，遠觀嘅話，仲以為呢幾位籃神突然訪港呢！

為咗向啱啱退役嘅Kobe致敬，大會特製咗兩尊1：1雕像，其中1尊擺放於利舞臺地面露天廣場。	今次展覽大有薪火相傳嘅意味，1：1雕像唔止有已成經典嘅MJ與Kobe，仲有目前炙手可熱嘅Curry。	除咗雕工精細外，膚色仲相當自然，令呢座1：1 Kobe雕像更顯得栩栩如生。

1：1雕像純屬非賣品，但大家毋須擔心會空手而回，因為同場設有EB Pop Up Store，畀球迷即場選購1：6或1：9球星Figure，1：9系列更加係品牌嘅最新力作，神似度唔輸畀1：6，關節仲係重新設計，可動幅度更高，而且喺體積與售價上，都比1：6更易入屋，身兼球迷與Figure控雙重身份嘅朋友，有啲錢係冇得慳o架！

「Dunk神360度全景照facebook放閃」設有特製攝影裝置，全方位將閣下嘅上籃英姿記錄落嚟，再上載到社交網站呃Like。	「Dunk神360度全景照facebook放閃」設有特製攝影裝置，全方位將閣下嘅上籃英姿記錄落嚟，再上載到社交網站呃Like。	Horace有感收藏文化似在沒落之中，希望藉着今次活動，向大眾介紹波鞋收藏呢種流行文化。

逾百神物晒冷

活動嘅另一焦點，就係有逾百對珍藏波鞋展覽，大部分仲係經典原版，唔止Air Jordan，仲有Kobe、LeBron、KD，以至新貴Curry系列，而為咗襯番奧運年，場內就有唔少奧運特別版現身，到底係邊個咁本事，可以張羅到咁多神物？原來係本地著名波鞋達人Horace Leung，當中嘅原版Air Jordan 11就係佢嘅私人珍藏︰「呢對AJ 11係1995年嘅原版，或者好多人話，我都有2012年，或者2000年嘅復刻版，原版又有咩咁特別？其實復刻幾多次都好，總會跟原版有出入，例如依家嘅Jumpman Logo，清一色向右邊上籃，但其實原版AJ 11嘅左鞋係向左邊上籃，之後嘅復刻版已經修正番晒，冇再出現。另一方面，依家嘅造鞋技術咁好，漆皮邊緣都可以做到與鞋面同色，但係呢對21年前嘅AJ 11，佢嘅漆皮邊緣就保留原色，呢種原始狀態，亦係原版獨有，係我哋呢班波鞋控先會留意嘅細節。」

神物掠影 Kobe 11親筆簽名球員版	1985年原版AJ 1	1995年原版AJ 11

360度上籃全記錄

唔止靜態展覽，現場亦有多項動態環節，畀球迷一展身手，特別推介360度全景拍攝專區，布置成籃底模樣，球迷到此展示入波Chok樣時，地板上嘅25個多角度高清鏡頭會同步拍攝，將你嘅英姿360度記錄落嚟，隨之而來嘅指定動作，當然係上載到facebook，成為你嘅呃Like新絕招。不過，先旨聲明，參加呢項活動需要符合若干嘅大會要求，詳情可以到現場向工作人員查詢，或者到facebook專頁瀏覽，總言之，身為籃球迷，就算NBA常規賽仲未開鑼，今個夏天都肯定唔會悶！

戰利品推介 EB Motion Masterpiece 1：9 Stephen Curry

EB Motion Masterpiece 1：9 James Harden

Greatest Of All Time@Lee Gardens

展覽日期︰即日至8月31日

開放時間︰10:00am~10:00pm（星期五、六及公眾假期前夕延長至11:00pm）

地點︰Hysan Place及利舞臺地面露天廣場

facebook︰HysanPlaceleetheatre、leegardenonetosix

撰文︰單富良

攝影︰陳世昌、張錦昌