真．無線耳機「聲」戰四強

Motorola VerveOnes+ 運動節拍

針對運動而設計的Motorola VerveOnes+，支援IP57防汗防水標準，用家可透過《Hubble Connect for VerveLife》App調校音色設定，包括Moto音效、現場、節奏、平均、麗音和低音效果，因應各人聽歌喜好去選擇，配合充電座嘅電量可使用超過12個鐘。

Cato表示：「VerveOnes+為迎合運動用家要求，聲音飽滿且中低音較強，尤其是聽節奏強勁的歌曲，低頻會較突出，不過相對欠缺細節。我試過配對時有少少Noise，背景未夠乾淨，幸好耳機喺冇任何耳托嘅情況下都好貼耳穩定，冇咁易跌出嚟，適合做運動時使用。」

VerveOnes+具有IP57防汗防水效能，當中低頻特強，跟住音樂節奏去做運動就最啱。	VerveOnes+充電座夠堅固，拎上手都幾實淨，而且橙色相當Colorful。	《Hubble Connect for VerveLife》App能夠顯示電量，甚至可調校低音均衡器。

Onkyo W800BT 音色先決

音響廠Onkyo出品嘅W800BT，能夠透過藍芽將音樂發送至主耳機（右耳機），再同步傳遞到副耳機（左耳機），可連續聽歌3個鐘。而圓形電池座亦可為耳機充電5次咁多，內裏更備有一條收納式USB充電線，即插即叉。

Cato試聽後稱：「W800BT喺咁多隻耳機之中取向較為平均，整體線性唔會偏重某一音頻，所以分到樂器、人聲同和音部分，有清晰輪廓和反差，分析力最為理想。藍芽連線嘅穩定性尚可，不過有時撥一撥頭髮會突然變得細聲。雖然佢嘅重量約7.5g，但戴得相當實淨，而且可以連耳托放入充電盒。」

W800BT勝在音色平均，分析力強，樂器和人聲分離，而且耳托相當穩陣。

雖然W800BT充電盒設計好靚，但塑膠盒面容易刮花，而且條充電線唔夠長。

Earin 激輕便攜

今次咁多款耳機之中，Earin屬最細最輕，因為只有3.5g重量，亦可透過《Earin》App查看電量和調校均衡器，甚至可增強低音效果。而耳機大約可播放兩個幾鐘歌曲，充電座亦夠充電3次咁多。

Cato指出：「Earin行清晰音色路線，不過中高音較尖，若果唔開App裏面嘅Bass Boost模式會唔夠低音，雖然質感唔夠實淨，但整體感覺唔錯。我鍾意佢夠輕，行街時唔會咁易跌出嚟。至於連接穩定性只屬一般，太大動作的話有機會其中一邊耳機斷線。」

Earin耳機細細粒之餘，僅重3.5g，加上耳塞夠長唔會咁易跌出嚟。	Earin充電座外觀型格，金屬感強，設計亦夠簡約，Cato最為喜歡。	《Earin》App介面簡潔，除了可展示左右耳機電量，還可調校-9至+9範圍均衡器。

fFlat5 Aria One 黑白雙聲

fFlat5 Aria One左右耳分別採用黑白色設計，支援IPX5防水規格，好明顯畀大家做運動時使用，加上內置收音咪及CVC消噪技術，講電話夠晒清晰。至於耳機能夠連續聽歌4個鐘，算係長氣。

Cato解釋：「Aria One聲音乾淨清晰，變相聽到更多細節。不過最大問題係穩定性，需要花少少時間配對Connect。至於佩戴感幾好，佢嘅形狀係專登根據耳窩斜度打造，用Fit Size耳托就可以戴得好實。」

Aria One支援IPX5防水，音色清澈且細節豐富，加上形狀切合耳窩斜度，佩戴舒服。

由於充電盒用上磁石設計，一擺上去就會自動吸實充電。

Cato總評：「期待第二代產品！」

「Onkyo W800BT和Earin是當中比較成熟的耳機，無論高低音和整體表現都相對較佳。之不過各廠都仍需努力，首要解決穩定性問題，我會將期望擺喺第二代產品上。」

查詢電話：（A）2374 4923、（B）3188 2012、（C）2395 3913、（D）2768 8595

撰文：黎子豪

攝影：張群生、郭凱敏