出發前必讀！德國自駕入油心法
去旅行唔想跟團走馬看花兼被趕鴨仔，自駕無疑是理想方案。問題是喺香港冇入過油，喺外地又識唔識用油槍呢？今日就以港人自駕熱點之一的德國睇真啲。
自助入油為主
德國的無限速公路不少人都想一試，租架跑車飛番轉都真係幾爽，但係長期高速行車，啲油會好似倒水咁倒，隨時行二、三百公里就要光顧油站。一般而言，德國的油站都是自助形式，駛架車入去係冇人Serve嘅，入油要自己一手一腳搞掂。唔好諗住唔識用油槍可以好容易問到人，大城市外的油站職員未必個個識講英文，油泵上的使用說明又係得德文，到時望住支油槍乜都做唔到，都咪話唔頭痕。
分清燃油種類
Plan咗去德國自駕的朋友，有冇諗過點樣自己入油呢？唔識？唔使愁，小記找來香港蜆殼零售業務部市場推廣經理曾穎思（Vanessa）為大家示範，順便教埋點樣揀油，出發前學定，去到就唔會手忙腳亂啦！Vanessa指，租車公司通常會向顧客講清楚汽車的燃油種類，入油前要確定入汽油或柴油，入錯油會導致汽車死火，甚至造成汽車損壞。萬一忘記燃油種類，油缸蓋背面很多時都會有貼紙說明，必要時可致電租車公司查詢，不要靠估。
入油先？付款先？
燃油主要有汽油及柴油兩種，當中還有分辛烷值。Vanessa表示，辛烷值愈高代表抗震爆能力愈高，引擎動力及加速表現都會愈好。一般而言，辛烷值愈高的燃油，售價會愈貴，如果諗住喺德國租架跑車揸，一嘗在無限速公路盡油飛馳的快感，豪啲入貴油也無妨。德國大多數油站都會附設一間24小時營業的便利店讓顧客付款，有些先入油、後付款，也有些先付款、後入油，部分油泵更安裝了刷卡或投幣裝置，不同油站有不同設定，要臨場執生。
掌握正確步驟
入油步驟其實好簡單，並不是甚麼複雜的事情，把車停靠在油泵旁，輸入加油金額或升數，再打開油缸蓋，將油槍放進油缸內，再拉起油槍把手就搞掂。如果想油槍持續加油至入滿，只要將把手末端的小掣向後撥便可，入滿後會自動「彈槍」停止。不過要謹記，雙手離開油槍前必須確定油槍已穩固在油缸內，入油中途跌槍導致燃油四濺，隨時會釀成嚴重意外。此外，入油時嚴禁吸煙，用手提電話一樣唔得，Vanessa解釋，使用手提電話或收發短訊時或會引發微量火花，產生危險。雖然強度不大，但在安全至上的大前提下，油站都會全面禁止使用手機。
撰文：鄭浩文
部分攝影：蔡浩文
部分相片由受訪機構提供