Submariner Camera潛拍神器魚樂無窮

航拍大家就玩得多，潛拍又玩過未？Bandai子公司CCP推出的潛拍神器Submariner Camera就主打潛水拍攝功能。其外形似足遙控潛艇，長度只有112mm，重量為90g，的骰小巧設計精細，而且吸水艙、排水艙、螺旋槳、渦輪引擎、探射燈一應俱全，單是外形已攞滿分。它由兩枚AA電池驅動，足夠玩40分鐘，玩家利用紅外線遙控器即可使它前進、後退、左右轉彎或360度旋轉，操作有點似遙控車，不難上手。話明潛拍，它備有鏡頭及256MB儲存容量，足夠影800張120萬像素相片，或者5分鐘的640×480解像度影片，雖然畫質同傳統攝錄機冇得比，但勝在夠穩定，而且放入魚缸都唔怕嚇親魚仔。考慮到水底光源不足問題，它特設探射燈以照亮水底，同時備有魚餌棒引魚仔入鏡，設計周到。