電競向新作5月互鬥

5月向來是遊戲界淡季,不過今年巧合地有兩隻玩法接近嘅大作同期登場,好有互撼意味!分別係由2K Games發行嘅《Battleborn》(為戰而生),以及由Blizzard開發嘅《Overwatch》(鬥陣特攻),兩者皆採用「電競向」團隊多人連線結合射擊玩法,FPS迷必玩!

《鬥陣特攻》分配職業

雖然論上市時間,5月24日推出嘅《Overwatch》,比已賣街嘅《Battleborn》輸蝕,但前者於月初踏正對方開賣日大玩全球5天公測,可玩晒全部遊戲內容,呢招都幾辣!Blizzard向來炮製開《Diablo》、《Warcraft》等系列,今次第一次推出FPS射擊遊戲,暫時收錄了21位英雄角色,每位都身懷獨特技能同武器,主要分為攻擊(Offense)、防禦(Defense)、肉盾(Tank)及輔助(Support)4種職業。就算玩家有幾好打,次次都極速Head Shot對手,但在《Overwatch》唔一定有優勢,皆因遊戲重視團隊合作,要喺6人團隊中分配角色職業先至係重點,否則好難佔領據點或者護送目標到終點。

純鬥技術及合作

《Overwatch》目前收錄12張地圖及4種對戰模式,較令人意外是以多人對戰的FPS遊戲去睇,竟然沒有常見的Deathmatch死鬥模式。而且遊戲沒有強迫玩家晚晚煲機升級及課金,因為角色本身無法升級,不少角色亦有固定武器,唔使賺錢升級裝備,玩法上較公平,純鬥技術及團隊合作。總括來說,《Overwatch》角色風格鮮明,戰鬥節奏明快,相信會是一個熱門的電競比賽項目!

《Overwatch》DETAILS

類型:射擊

平台:PC、Xbox One、PS4

售價:待定(5月24日推出)

網址:https://playoverwatch.com/zh-tw/

《為戰而生》玩法多元化

《Battleborn》是由《Borderland》遊戲系列團隊開發,無論角色造型及武器系統都延續天馬行空意念。暫時遊戲有25個英雄角色,各自有專屬個性及獨特武器能力,較特別是角色擁有Helix System技能樹系統,每當升一級可選擇開啟一款攻擊或防守或輔助型技能,用來微調角色能力以達致平衡。遊戲亦相當講求團隊合作,以5對5進行作戰。有趣的是每邊陣營都有一個強大火力的巨型機械人,玩家要利用自動生成的小兵進攻,再趁敵方巨型機械人解除防禦時全力進攻;而且遊戲需要運用收集到的錢幣去升級基地設備,玩法較多元化,但相對地要兼顧嘅嘢較多,跟《Overwatch》取向稍有不同。

《Battleborn》DETAILS

類型:射擊

平台:PC、Xbox One、PS4

售價:$468(PC)、$368(Xbox One、PS4)

網址:https://battleborn.com/

撰文:布偉倫