HTC Vive率先玩！360度VR射喪屍

VR（Virtual Reality）係今年科技界新寵兒，由Google Cardboard到PlayStation VR，間間廠都排住隊出相關Gadgets。但論真實感同好玩程度，HTC嘅Vive一定最勁，玩家不僅可於虛擬空間內360度自由走動，仲可用手掣開槍、射箭等，小記試玩喪屍Game時真係嚇到嘩嘩大叫，預計今年5月在港上市，值得期待！

《The Brookhaven Experiment》的喪屍逐步行近，玩家邊避邊射，聲畫氣氛極佳。

90fps顯示冇頭暈

小記去年曾玩過Vive測試版，但當時的頭戴式顯示器過重，玩得耐隨時頸痛。今次的量產版明顯有所改良，首先是顯示器縮細兼減磅，鼻托更為貼臉，同時手掣更符合人體工學設計，適合長時間用來打機。廠方指，Vive支援2,160×1,200解像度，畫質比很多VR裝置靚，而且表面有32個感應器，配合90fps顯示速度，小記360度移動時畫面也能同步追蹤，唔會因視差而出現頭暈。

簡易設定遊玩空間

跟其他VR裝置得個「睇」字唔同，玩Vive時行得兼跳得，需要嘅空間咪好大？非也，廠方表示只需2×1.5米空間便能運作，一般客廳都夠玩，就算地方真係唔夠大，都可改用Standing模式企定定玩。其安裝方法亦比想像中容易，先把一對Base Station呈對角線放喺高於頭部位置，再以手掣定出遊玩空間的中心點及四邊即可，前後僅需數分鐘便完成。問題反而是Vive對電腦系統有高要求，基本需要Intel Core i5處理器、8GB RAM及GeForce 970顯示卡等，想玩的話可能要升級電腦了！

Vive的美國售價為799美元，預計今年5月在港上市。

Vive支援過百款Steam平台程式，日後賣街版仲會附送3款遊戲。

透過前置鏡頭，玩家唔除顯示器都看到真實世界，並有黑白及彩色兩個模式。

玩法千變萬化

目前Steam平台提供超過100款對應程式，由需要動手動腳的射擊Game，到齋睇的電影都有，廠商透露愈來愈多 Third Party加入開發，例如可走入IKEA廚房、Audi汽車參觀，又或坐進太陽神11號漫遊太空等，玩法千變萬化！小記試玩《The Brookhaven Experiment》時，戴上顯示器後恍如進入另一世界，可隨處走動之餘，仲可辨別喪屍位置和距離，用手掣開槍更能同步射爆喪屍，High到震！為了讓玩家適時抽離遊戲，Vive還細心地加入前置鏡頭，啟動一刻即可看到真實世界。售價方面，Vive的美國定價為799美元，計落跟一部旗艦手機的售價相若，都算合理啦！