女人大晒！Lady's Phone愛鬥靚

過幾日就到三八婦女節，喺呢個「女人大晒」嘅日子，當然要好好感謝身邊嘅女士啦！無論係媽咪、老婆抑或女友，送番部Lady's Phone畀佢哋就最啱。今次機Gor搵嚟LG K10 LTE同埋Sugar C-88 Dual，兩款手機不約而同內置一系列女士必Like 嘅功能，一於嚟3回合比併，睇吓邊部最啱Feel！

LG K10 LTE售價：$1,698 / 左（a）<br>Sugar C-88 Dual售價：$3,388 / 右（b）

LG K10 LTE售價：$1,698 / 左（a）
Sugar C-88 Dual售價：$3,388 / 右（b）

LG K10 LTE弧面玻璃

LG早前喺MWC展覽，除咗推出「拆骨」設計嘅旗艦機G5，仲有全新中階K系列，當中以K7和K10較有睇頭，規格較強嘅後者上周率先在港開賣。新機最大特色係圓滑外形，黑、白兩色機身均採用2.5D弧形玻璃，似足一塊扁平卵石。背殼仲加入大量坑紋，咁就唔怕女仔手細跌機落地。

Sugar C-88 Dual閃石皮底

以閃石加女性設計做賣點，成功令法國品牌Sugar殺出一條血路！C-88 Dual唔似舊型號採用塑膠或金屬機背，首次改用仿皮物料打造，配合菱格壓紋及玫瑰金配色，觸感柔軟舒適，外形亦見高貴。新機當然保留其招牌閃石設計，兩側鑲嵌82枚ZIRCONIA人工寶石，Bling Bling咁閃有邊個女士唔心動？

LG K10 LTE可換電兼插卡，增強續航力和擴充容量。	LG K10 LTE機背加入大量坑紋，配以招牌Rear Key設計。	Sugar C-88 Dual機背大玩仿皮物料，左右側以閃石包圍。
Sugar C-88 Dual支援雙卡雙待，不過電池就唔拆得。

第一回合：自拍鬥靚樣

做得Lady's Phone，自拍功能必不可少。機Gor搵嚟模特兒Scarlet出街試拍，喺猛烈陽光下K10 LTE嘅自拍質素唔錯，不過前置鏡頭得500萬像素，畫質始終唔及C-88 Dual嘅800萬像素前置鏡頭。而且後者支援滑膚、大眼、瘦面3種效果，變靚話咁易。雖然K10 LTE冇美肌功能，但加入手勢自拍玩法，自拍時攤開手掌再揸實拳頭即可啟動自拍倒數，唔使分心撳快門掣，都算方便。

K10 LTE支援手勢及語音自拍，加上可以機背音量鍵充當快門掣，自拍方便。	日光下自拍成像都唔差，膚色自然，可惜得500萬像素。	C-88 Dual可即時加入瘦面等效果，素顏都變索女。
開啟50%瘦面及滑膚效果，即時變得又白又滑。

第二回合：煲劇比續航

十個女士有九個鍾意煲劇，如果手機睇片效果唔掂隨時火都嚟！機Gor用上近期至Hit嘅煲劇App《Viu》，以「細膩」畫質串流播放韓國綜藝節目。雖然兩機嘅屏幕解像度都係720p，但K10 LTE除咗擁有較大嘅5.3吋芒外，可視角度都唔差，而且屏幕味精感冇C-88 Dual咁重。值得一提，兩款新機均支援4G LTE網絡，串流煲劇唔怕窒，機Gor試播咗1小時後，兩機嘅電量均跌至80%左右，可見續航力不相伯仲。

K10 LTE採用5.3吋屏幕，色水自然，睇劇效果較佳。

C-88 Dual備有5吋720p屏幕，用嚟串流睇片都算流暢。

第三回合：介面Vs操控

女士揀手機除咗要有外在美，介面易用和操控簡便都好重要。K10 LTE預載最新Android 6.0系統，唔使慢慢等廠商升級，同時用上簡潔嘅UX 4.0介面，特別在用家可自訂個人化圖示。而C-88 Dual則預載Android 5.1系統，自家介面似足iOS咁將圖示擺晒喺主頁，搵Apps相對容易；而且介面加入唔少女性化設定，好似虛擬Home鍵用上鑽石圖案，仲內置線上主題供下載，好Fancy！

K10 LTE的介面可自訂Apps圖案，用相片來做Icon都冇問題。	Android 6.0系統可將記憶卡變作內置記憶體使用，咁就唔怕容量不足！	C-88 Dual內置《手機美化》，大量主題、Wallpapers供下載。
《手機助理》助用家優化系統，操作時可經常保持快速。