日本CP+直擊 EOS-1D X Mark II 14fps 體操逐格捉

機關槍快門試拍選手

小記甫進入CP 會場，第一時間衝到Canon嘅新機試玩區，現場特別安排了多位體操選手畀大家試拍，焦點自然落在EOS-1D X Mark II，一拎上手就感到墜手又紮實，而且規格更大幅提升，用上2,020萬像素全片幅感光元件，感光度可擴展至最高H3（ISO 409,600），就算喺唔夠光嘅會場環境，都可用到高速快門作運動攝影。

新機最勁係連續對焦有14fps連拍速度，若果用Live View仲可去到16fps，淨係聽快門聲好似機關槍咁快，就知機王確係唔嘢小。

支援4K攝錄功能

新機大玩「相」「片」雙修，不僅影相夠快，拍片功能亦大幅提升，除了可拍到1,080@120fps玩慢動作重播外，仲加入4K@60fps攝錄功能，無論畫質和流暢度都超晒班。對焦方面都有新搞作，它屬首部植入雙像素CMOS對焦系統嘅全片幅單反，Live View時可利用篤芒對焦，就算小記喺會場拍攝唔同距離嘅主體同景物，都可以好快鎖定焦點，用嚟拍片便可快速捕捉影像。

EOS-1D X Mark II機身設計同上代差唔多，機頂凸出部分內置GPS組件。	新機試玩區安排了多位體操選手供試拍，透過連拍去捕捉快速動作。	置身8K影像體驗區，感覺猶如坐緊火車一樣。

EOS 80D 電Zoom拍片

中階單反方面，現場有APS-C片幅嘅EOS 80D供試玩，它用上45點全十字形自動對焦系統，幾乎霸晒大半個畫面，令對焦更精準。80D明顯針對拍片而設計，不僅拍到1,080@60fps全高清片，旁邊仲有3.5mm插口可加裝DM-E1收音咪。廠方仲特登出咗支18~135mm鏡頭，用上寧靜嘅Nano USM摩打，可夾埋全新PZ-E1電動變焦轉接器一齊用，令鏡頭變成「電Zoom」，拍片時Zoom In或Zoom Out更流暢。

內置2,020萬像素全片幅感光元件，以及雙DIGIC 6+超高速影像處理器。	連拍速度達到每秒14張，用Live View仲可做到每秒16張。	提供4K@60fps拍片功能，並且拍到1,080@120fps慢鏡。
採用雙卡槽設計，支援一張CF和一張CFast記憶卡。	EOS 80D針對拍片而設計，可安裝全新18~135mm鏡頭、PZ-E1電動變焦轉接器及收音咪。	18~135mm鏡頭（左）和PZ-E1電動變焦轉接器（右）均備有接點調校變焦速度。

G7 X Mark II 搭載DIGIC 7

除咗單反大機之外，DC機仔一樣有新品壓陣，當中旗艦級G7 X Mark II率先用上DIGIC 7影像處理器，提升人面追蹤表現，就算Show Girls喺會場行來行去都可全程捕捉，加上4.2倍變焦嘅F1.8大光圈鏡頭，試拍時雜訊控制得相當好。此外，SX720 HS天涯機仔用上2,030萬像素CMOS，機身細細竟然收納了一支40倍變焦鏡頭，Zoom到去會場另一邊都睇得清楚。

今年展出東京2020奧運會/殘奧會黃金夥伴項目的產品線。

長炮試玩區位於高處，可影到樓下嘅體操選手，快門聲不斷。

G7 X Mark II內置DIGIC 7影像處理器，備有反芒和大光圈鏡頭。

SX720 HS天涯機仔有紅、黑兩色機身，內置40倍變焦鏡頭。

同場加映：Digital House一站式體驗

小記今趟唔單止去咗CP ，仲走到位於銀座嘅Digital House朝聖，店內不僅擺咗大量新機及鏡頭供試玩，仲有小型教室讓攝影師分享拍攝技巧。貫通此處的Gallery，展出咗不同攝影愛好者嘅作品，而且每個禮拜都會更換新作，還有機會於Canon Salon與專業攝影師交流，一個地方有齊唔同功能。

銀座Canon Digital House地方相當大，配套齊全。	銀座Canon Digital House已經可試玩EOS-1D X Mark II，各位去開日本不妨入內朝聖。	唔少展區都請來攝影師分享，仲有模特兒任影。
I-O DATA每年都會搵模特兒扮牛女，今年仲玩埋唔同顏色。	專門生產腳架嘅Sirui，以美人魚Show Girl吸引影友圍拍。

特派記者：黎子豪

鳴謝：Canon