Notebook變革開工激鬥

雖說「未過新十五，都係拜年時」，但唔少人已經開工搏殺。想趁新正頭去舊迎新，換部開工Notebook搵真銀？機Gor當然有好介紹，事關Samsung及HP近期分別推出Notebook 9 Spin同Elite x2 1012手提電腦，機身夠輕、規格夠強之外，仲大玩變形篤芒功能，用嚟做Presentation或者傾生意都好啱使！
Samsung Notebook 9 Spin售價：$12,980（左）（a）<br>HP Elite x2 1012售價：$12,788（右）（b）
Samsung Notebook 9 Spin售價：$12,980（左）（a）
HP Elite x2 1012售價：$12,788（右）（b）

Notebook 9 Spin 360度反芒

Samsung嘅Notebook 9系列向來玩薄玩型，拎出街見客夠晒體面。來到Notebook 9 Spin，單睇型號有個Spin字都知佢玩「轉」，可將屏幕360度翻轉變成平板。而13.3吋顯示屏擁有3,200×1,800超高解像度，睇圖更加仔細；另加入戶外超光模式，一撳掣即可將亮度推高至700nit，就算臨急臨忙要喺戶外工作都冇問題。新機拎上手嘅手感唔錯，1.35kg重量又唔算過分，只係機Gor覺得佢變成平板後，單手操控有啲難度啫。

Elite x2 1012 二合一設計

HP Elite x2 1012屬二合一筆電，由平板及鍵盤兩部分組成，將12吋平板連上鍵盤後即可變成手提電腦，重量只有1.235kg，拎出街開工都好方便。

Notebook 9 Spin機身重約1.35kg，便攜性高。
  • Notebook 9 Spin機身重約1.35kg，便攜性高。
機身提供microSD卡槽及USB等連接介面，都算齊全。
  • 機身提供microSD卡槽及USB等連接介面，都算齊全。
Elite x2 1012加埋鍵盤的重量只有1.235kg。
  • Elite x2 1012加埋鍵盤的重量只有1.235kg。
機背加入支撐架，並配備指紋掃描器提升保安性。
  • 機背加入支撐架，並配備指紋掃描器提升保安性。

硬件則提供不少選擇，今次測試嘅Intel Core M7-6Y75屬於中上型號，通過美國軍用標準MIL-STD-810G測試，有唔錯嘅防震能力，始終搵食機都係用高啲規格較好。另加入B&O調音版面，內有消除雜音軟件，令網絡會議時收音更清晰；仲送埋ActivePen操控筆，畫圖記事倍添方便。

第一回合：鬥軟硬操作

兩機嘅規格其實幾接近，13.3吋Notebook 9 Spin重約1.35kg，12吋Elite x2 1012重1.235kg，分別亦唔明顯，只係後者可拆掉整個鍵盤，令重量減至840g。

Notebook 9 Spin打字手感較佳。
  • Notebook 9 Spin打字手感較佳。
Notebook 9 Spin觸控屏幕的靈敏度亦算不俗。
  • Notebook 9 Spin觸控屏幕的靈敏度亦算不俗。
Elite x2 1012鍵盤微微傾斜，打字手感幾好。
  • Elite x2 1012鍵盤微微傾斜，打字手感幾好。
Elite x2 1012拆除鍵盤後重量僅840g，篤芒好輕鬆。
  • Elite x2 1012拆除鍵盤後重量僅840g，篤芒好輕鬆。

機Gor實測打字篤芒操控，發覺Notebook 9 Spin嘅按鍵回彈力好少少，加上它預載自家程式《SideSync 4.0》，可將屏幕內容分享畀其他裝置；同時可透過《Wi-Fi Transfer》傳送檔案，實用性唔錯。而Elite x2 1012較注重保安功能，如加入《HP Touchpoint Manager》管理軟件，利用雲端提升生產力。

第二回合：鬥特異功能

Notebook 9 Spin特別之處係屏幕既可180度平放，亦能360度翻轉變成平板使用，唔怕忘記帶鍵盤底座出街。相比之下，二合一設計嘅Elite x2 1012功能較多，如機背加入指紋掃描器，掃一掃手指即可Log In，減低公司資料外洩機會。對於機Gor嚟講，保安還是其次，最吸引係附送咗支ActivePen操控筆，提供2,048級壓感，可以喺《OneNote》畫圖兼寫字，同客人演示時Pro好多。

將Notebook 9 Spin屏幕360度翻轉後即可變成平板使用，並內置多種顯示模式。
  • 將Notebook 9 Spin屏幕360度翻轉後即可變成平板使用，並內置多種顯示模式。
Elite x2 1012配備ActivePen操控筆，採用Wacom技術並具有2,048級壓感。
  • Elite x2 1012配備ActivePen操控筆，採用Wacom技術並具有2,048級壓感。

第三回合：鬥聲畫表現

聲畫表現對開工機嚟講都好重要，除咗要播片畀客睇，仲可用作多媒體演示和娛樂需要。Notebook 9 Spin擁有3,200×1,800解像度及戶外超光模式，機Gor實試喺猛烈陽光底下睇片，顯示相當清晰，而且可視角度高，加上屏幕可以任扭，調校播片角度方便啲，三五成群圍埋睇片都冇問題。而Elite x2 1012只有1,920×1,080解像度，畫質明顯輸蝕咗啲，幸好有B&O音效加持，挽回不少分數。

Notebook 9 Spin解像度較高，無論色彩感或睇片表現俱佳，並支援戶外超光模式提升畫面亮度。
  • Notebook 9 Spin解像度較高，無論色彩感或睇片表現俱佳，並支援戶外超光模式提升畫面亮度。
Elite x2 1012備有12吋全高清畫質，顯示效果不及對手，幸好加入B&O調音版面。
  • Elite x2 1012備有12吋全高清畫質，顯示效果不及對手，幸好加入B&O調音版面。
香港資訊科技商會榮譽會長方保僑
  • 香港資訊科技商會榮譽會長方保僑

達人教路：香港資訊科技商會榮譽會長方保僑：「內外保護更安心。」

「開工Notebook要經常帶出帶入，當然愈輕愈好，這方面可拆鍵盤的二合一設計會有明顯優勢，而可翻轉360度的變形手提電腦無可避免會較重。以我嘅使用經驗，二合一裝置有七成時間都用唔着鍵盤，無必要帶埋鍵盤底座外出工作，反而要適應《Windows 10》嘅輕觸操控需要一點時間。另外變形揀開工Notebook有兩點要留意，一是需購買具較強保護性的電腦袋或機套；二是要安裝Anti-Virus和移除Spyware軟件，令工作更安心。」

機Gor Report：Notebook 9 Spin演示一流

Samsung Notebook 9 Spin同HP Elite x2 1012針對嘅用家稍有不同，前者較為Trendy，適合經常要見客和演示的用家，娛樂表現亦較出色。後者比較專門，加入指紋保安和手寫功能，適合IT從業員和設計師使用。至於點揀就好睇各人嘅工作需要，機Gor平時既要打稿趕Project，又要見客Presentation，梗係揀Notebook 9 Spin啦！

Samsung Notebook 9 Spin規格表

處理器：Intel Core i7-6500U

記憶體：8GB

儲存容量：256GB

顯示屏：13.3吋輕觸式（3,200×1,800解像度）

作業系統：Windows 10

體積：約314.7×220.7×14.9mm

重量：約1.35kg

HP Elite x2 1012規格表

處理器：Intel Core M7-6Y75

記憶體：8GB

儲存容量：256GB

顯示屏：12吋輕觸式（1,920×1,080解像度）

作業系統：Windows 10 Pro

體積：300×214×8mm（平板）、300×214×13mm（平板連鍵盤）

重量：840g（平板）、1.235kg（平板連鍵盤）

機Gor Profile

機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢電話：（a）3698 4698、（b）800 938 833