提升文昌運 讀書工作同醒神
好多人以為文昌運只係對讀書人有利，事實上並非如此，對工作亦有正面嘅影響，只要提升文昌運，自然全年工作順順利利。現在就由玄學家林惠江同大家講解一下增運方法，既簡單又有效，咁就升職加人工樣樣嚟，讀書人則考試科科掂！
搵個人文昌位
玄空風水學上以四祿為文昌星，主思維敏捷、靈感性高；又相傳天帝命令文昌帝君到凡間掌管讀書人嘅科舉考試，以及文職人員嘅職位升遷，因此從古至今，唔少讀書人或從事文職嘅朋友都會拜祭文昌帝君，祈求考試順利及工作步步高陞。另外，喺風水學研究上，善用文昌位能夠令人頭腦靈活，提升吸收能力，令大家專注於學業或工作上，自然有助催旺工作及學業運勢。事實上，喺現今科技知識高速發展下，無論閣下係白領定藍領，文職定武職，各行各業都需要文昌帶來好運氣。
今年流年文昌星飛臨正西方，即係文昌氣場位於屋宅嘅西方位置，只要喺呢個方位擺放催動文昌嘅風水物品，就可以達到催旺效果。此外，林師傅表示可以按出生年份或十二生肖搵出個人文昌位，如果屬於自己命格嘅文昌位與流年文昌位方向不同，大可選擇喺方便又合適嘅方位布置風水擺設，再加上自己嘅努力，自然收到事半功倍嘅效果。
出生年份／文昌位
1960年、1970年、1980年、1990年、2000年：西北方
1961年、1971年、1981年、1991年、2001年：正北方
1962年、1972年、1982年、1992年、2002年：東北方
1963年、1973年、1983年、1993年、2003年：正東方
1964年、1974年、1984年、1994年、2004年：東南方
1965年、1975年、1985年、1995年、2005年：正南方
1966年、1976年、1986年、1996年、2006年：西南方
1967年、1977年、1987年、1997年、2007年：正西方
1968年、1978年、1988年、1998年、2008年：西南方
1969年、1979年、1989年、1999年、2009年：正西方
生肖／文昌位
猴：西北方
雞：正北方
狗：西南方
豬：東北方
鼠：正東方
牛：正西方
虎：東南方
兔：正南方
龍：西南方
蛇：西南方
馬：正西方
羊：正西方
註：可按出生年份或所屬生肖找出文昌位，二擇其一皆可。
文昌塔吸納旺氣
屋企係每個人嘅根，當搵到適合自己嘅文昌位後，大家可將書枱或書架放於文昌位置，並喺書枱上或書架處擺放4支已用墨汁開筆嘅毛筆，並以筆架掛起。由於4數為文昌意思，用墨汁開筆嘅毛筆，寓意文筆生輝，倒吊都有墨水，具有催旺文昌運嘅作用。另外，大家亦可選擇擺放文昌塔，除咗吸納文昌之氣外，還有化煞作用；或擺放4支水種富貴竹，同樣可以吸納文昌運氣，取其生生不息好意頭；又或喺牆身掛上勵志書畫，有助堅定學習意志。林師傅補充指，因今年二黑病符凶星及五黃煞星分別落於中央位和東北位，要減弱呢兩顆災星所帶嚟嘅影響，可用金屬或銅製嘅文昌塔擺放喺呢兩個方位，一來可化去煞氣，二來又可加強文昌運勢。
吉時溫習成績好
原來每個人喺某段時辰頭腦特別靈活、記憶力最好，讀書人喺呢個時辰溫習，自然零舍讀入腦，從而考取好成績啦。林師傅已為大家計出十二生肖溫習吉時，大家可以根據以下資料參考。
十二生肖溫習好時辰
猴：亥時（9:00pm~11:00pm）
雞：子時（11:00pm~1:00am）
狗：申時（3:00pm~5:00pm）
豬：寅時（3:00am~5:00am）
鼠：卯時（5:00am~7:00am）
牛：酉時（5:00pm~7:00pm）
虎：巳時（9:00am~11:00am）
兔：午時（11:00am~1:00pm）
龍：申時（3:00pm~5:00pm）
蛇：申時（3:00pm~5:00pm）
馬：酉時（5:00pm~7:00pm）
羊：酉時（5:00pm~7:00pm）
水種植物利思考
如果想工作順利兼且思考靈敏嘅話，咁就要催動辦公室嘅文昌位，方法先按出生年份或十二生肖找出個人文昌位，或喺西方位文昌位置擺設水種植物。如果唔可以擺放植物嘅話，以植物圖案、勵志嘅字畫等代替，同樣可發揮催旺文昌運之效。另外，大家亦可以放置綠幽靈水晶喺辦公枱上，有助增強智慧。
林師傅又指文昌布局應以寧靜優雅為主，座椅靠牆，而書枱可置於窗旁，令光線充足，並且保持空氣流通，但要注意唔可以向窗，避免因此而分心。文昌方位最忌陰暗又潮濕，雜物胡亂堆放，而座椅後空曠以致背後冇靠山，則會令人欠缺安全感，從而令工作產生負面影響。
最佳催運衣着
正所謂人靠衣裝，如果想讀書同工作都咁醒神嘅話，好多時我哋會換上靚衫嚟提升自己嘅情緒。林師傅指適合嘅衣着顏色，不但可以起到提升正能量嘅作用，透過佩戴合適嘅飾物亦可增強文昌運。大家應謹記催動文昌運嘅衣着及飾品，必須色澤鮮明並以綠色為主調，飾物形狀以長方形或塔形為佳，並可根據十二生肖所屬五行嚟配顏色，自然可以令到文昌運更旺。
十二生肖強運顏色
猴：粉黃
雞：粉黃
狗：粉紫
豬：金色
鼠：金色
牛：粉紅
虎：粉藍
兔：粉藍
龍：粉紅
蛇：粉綠
馬：粉綠
羊：粉紅
拜文昌帝君要帶葱
唔少人會按傳統習俗拜文昌帝君，只係參拜嘅流程又應該點樣做呢？林師傅表示文昌帝君為掌管凡間科舉考試嘅神仙，隨從有天聾、地啞兩位神祇，佢哋分別代表「非禮勿聽」、「非禮勿言」。早於元朝已受到民間拜祀，因靈驗之故，至今仍然受到民間供奉。丙申猴年農曆二月初三（3月11日）定為文昌帝君誕，想祈求考試成績理想嘅學生，同埋希望升職嘅工作人士可以喺呢日到文昌廟拜祀，祈求保佑。至於拜祭時嘅供品係葷定素，悉隨尊便，並準備香燭衣紙即可。如果喺家中拜祭嘅話，清香一炷就得。
大家記得按照習例，準備葱同芹菜以取其諧音，令小朋友可以「聰聰明明」、「勤勤力力」，每樣數棵就已經足夠。上香後將葱同芹菜，喺香爐上順時針轉3個圈，取其神力加持，帶返屋企後掛於房間中，分幾日做餸進食。此外，亦可攜帶毛筆或文昌塔到文昌廟，同樣喺香爐上順時針轉3圈，以祈求神力開光加持。要注意嘅係，當日千萬唔好買風車返屋企，因為文昌之氣屬木，風車以金紅兩色所製，喺五行中木最忌金火，掛風車只會損害文昌運勢。
撰文：林國豪
攝影：陳世昌
模特兒：Wingkie@Inflate
鳴謝：玄學家林惠江