情人節冧之選 Like & Dislike
還有兩天便是情人節，還未準備好禮物送給另一半？要知道情人節禮物不比新年禮物，不是夠豪華、夠體面便足夠，還要講求心思，兼迎合對方心水。不如參考吓潮流組意見，從他們最想/唔想收的Gift Choice之中，搵吓靈感，挑選一份對方會Like爆的窩心禮物吧！
最唔想收：花
「情人節又到，最想收/不想收的情人節禮物，真係人人不同。但我謝絕做『港女』，一世人最怕情人節當日收花，尤其送上公司，告知全天下『有追求者』或『晒恩愛』，場面好老套又刻意。」
最想收到：手袋
「收袋就最好，因可在平日及節日使用，講真咩牌子都無所謂，老套講句：『物輕情義重』，情人節送禮只是一份心意，收到已經好開心。」
最唔想收：內衣
「當女人穿上性感內衣，相信是男人最難抗拒的誘惑，因此有不少男士，尤其浪漫的法國男士都喜歡送內衣給另一半。但我最唔想收到的情人節禮物就是性感內衣，不是不喜歡，而是我對男人揀內衣的品味有保留，而且收到這份禮物就只有他一個去欣賞，不能在朋友面前炫耀，才是最大遺憾。」
最想收到：DIOR JOAILLERIE鑽石、橄欖石耳環
「一直都覺得品牌設計師Victoire de Castellane的創作既漂亮時尚又帶點前衞，而且色彩豐富，完全擺脫高級珠寶的設計框框。好似這對耳環，左右兩邊設計不一，一邊是單一顆鑽石耳環，另一邊則配以艷麗的青色橄欖石，感覺華麗但又帶點型格，即使平日穿窄牛仔褲高踭鞋Casual Look時佩戴都好睇。」
最唔想收：Fedora Hat
「先旨聲明，小記是個帽癡，幾乎每一日都帽不離頭，而定番的Fedora Hat更是小記近年常備的產品，差不多一年戴足365日。由於戴和買得太多了，所以唔想有人再送畀我呢！不過如果是Nick Fouquet、REINHARD PLANK或Horisaki的出品就另作別論了。」
最想收到：Alden Whiskey Shell Cordovan Indy Boot
「情人節始終想打扮得斯文一點，如果有對皮鞋配襯咁就最理想不過，Alden的王道款Indy Boot一直都是小記的心儀之選。本來都唔算太難搵，但如果想要搵Shell Cordovan馬匹臀皮配Whiskey色的話，就難度頗高喇，如果有人同我『班』到一對返來就好喇！」
最唔想收：香薰蠟燭
「一向喜歡香薰蠟燭，因可以令氣氛更舒適和Cozy。多年來多得各方友好與同事們的厚愛，家中日積月累了大量香薰蠟燭尚未開盒，估計點多3至4年都未可以點完，所以這幾年內再不想收到任何香薰蠟燭……不過diptyque的Baies香薰蠟燭就除外！」
最想收到：PANERAI
一向鍾情男裝款的大錶，PANERAI更是本人頭號至愛。剛去完SIHH錶展，對品牌新出的Luminor Special Edition Set一見鍾情。一套兩款的腕錶，以品牌Pre-Vendome年代、為史泰龍訂製的兩款Slytech腕錶為靈感，一枚是全黑左撇子版Black Seal，另一枚是白面款式，各有特色，可以一次過滿足兩個願望，正！
最唔想收：情侶Tee
「年少輕狂已做過（着情侶裝）的事，唔想再重複上演。顏色與圖案一模一樣，只分男女裝大細之別的上衣，兩個着住出街，等同額頭寫住我倆是Couple，唔想畫公仔畫出腸，這種事情可以留待在家穿上情侶睡衣或拖鞋，件事反而會更甜蜜。」
最想收到：遺忘了的手寫心意
「跟隨時代的步伐，甚麼也是電子化、程式化，不費吹灰之力隨手一按的習慣，就可表達喜怒哀樂愛恨……雖然方便，但卻埋沒了發自內心的情感。若然情人肯花時間手寫心意卡，將心裏想說的話一一用文字記錄下來，即使將來重溫也能感受那份真誠！」
最唔想收：領呔
「自從中學以後就已經無再打呔，做過不同工作就淨係未做過「西裝友」，所以到依家返工都未試過要打呔。實不相瞞亦唔係好記得點打，就算識打都唔會打得靚，所以如果我不幸收到一條呔做情人節禮物的話，相信最終都會淪為一件Props，畀Model襯衫影相之用！」
最想收到：COACH全皮背囊
「雖然返工出街向來都唔鍾意用袋，但放假去吓短Trip有時都想有個袋可以裝吓嘢，以前比較鍾意用Tote Bag，但因為不時要幫老婆裝埋行李，所以近期都鍾意用大背囊。好似今季COACH呢個全皮之餘仲要襯埋迷彩圖案嘅背囊真係不得了，希望夫人見字立刻送我一個就夠晒Sweet！」
最唔想收：致肥無誠意朱古力
「對於小記這減肥狂人來說，朱古力與花實屬同類——無誠意之最，無論是幾元或是過百元綴金的朱古力，到最後都是致肥元兇。與其花金錢買節日朱古力，吃完沒甚麼留下作留念，我寧可收到心意卡，至少心意卡不會看肥人。」
最想收到：KIKO MILANO 心心眼BFF系列
「KIKO MILANO全新的BFF系列是我近日的心水，心形元素融入妝品中，無論是唇膏、眼線液、睫毛液、胭脂或香水等，都滿載甜蜜愛心，配以桃紅撞色化妝袋，收到的女生必定可以擺個陣影張Snap。」
撰文：潮流組
查詢電話：
（A）2524 4492
（B）800 969 886
（C）2829 2711
（D）3101 1485
（E）2405 1388
（F）2789 9911
（G）2113 0023