Ferrari California T　與天同行

Turbo引擎近年再次流行，向來以自然吸氣引擎主打的法拉利（Ferrari），過去一年也先後推出搭配Turbo的California T及488，雖然不少人對NA偈仍然情有獨鍾，不過為符合愈趨嚴謹的排放標準，車廠也不得不借縮減容積的方法來達致減排目的，加上渦輪增壓有助提升性能，就如搭載Turbo的California T，馬力便較09年推出的首代California多出100匹，實在沒有抗拒的理由。

Ferrari California T

排氣聲依然澎湃

法拉利NA引擎的高轉聲響令人亢奮，也是為人所津津樂道的地方，當法拉利宣布為California導入Turbo時，不少車迷都懷疑California T會否失去過往的「聲」威。早前向代理借來California T揸咗個周末，可以肯定咁講，排氣聲依然澎湃，聲線亦較以往來得低沉，情況有點似放了個大低音箱在車尾，每畀一下油都震撼人心。姑勿論呢把聲啱唔啱聽，現實是California T的性能強了很多，0~100km/h加速縮短至3.6秒，這樣夠誘因放棄NA了嗎？

開篷游走好Feel

其實，揸拉利唔一定要搏晒老命咁踩油先叫好玩，在藍天白雲下，開篷Hea遊一樣好Feel，相對於458或488呢類戰鬥格跑車，性格相對溫柔的California T，特別啱喺呢個情景下出現。價值三百多萬元的California T，雖只是法拉利的入門型號，不過其吸睛能力也非同小可，黃昏時分泊架車喺加連威老道，不到半小時已有不下十數人舉機拍攝，部分人更探頭研究，法拉利的魅力有誰可比？

ESP OFF更好玩

我必須強調，California T的「溫柔」只是相對於同樣搭配V8 Turbo的488，其骨子裏依然火氣十足，不介意高耗油的話（相信車主都唔會介意），一腳把油門踩到底便可感受到其驚人的加速力，二波未盡已突破晒全港最高法定車速，山路上除了小部分路段需短暫入三波外，基本上齋用一個二波已夠玩晒。V8引擎在渦輪增壓的加持下，四千多轉已將755Nm的峰值扭力全數釋出，若出彎時過早起油或畀油過多，很容易會觸發電子穩定系統的介入。嫌干預太多、自問技術又有咁上下料，不妨試吓將軚環上的行車模式鍵扭至「ESP OFF」，車尾動態會生猛得多，甚至容許一定程度的外搬，保證過癮。

放大圖片	電動硬摺頂採用輕量鋁材製造，打開過程只需14秒。	按住這個按鍵便可開或閂篷，操作全自動進行。
車廂設計富跑味，但又未至於戰鬥格。	門檻加上金屬Ferrari飾牌，看起來更見高貴。	軚環後方設有大型轉檔撥片，轉波盡在彈指間。

性能油耗長足進步

渦輪遲滯是很多Turbo車都有的現象，不過在California T上並不明顯，引擎反應時間亦十分快。據廠方所講，其雙渦管渦輪增壓器的設計改良了從汽缸至渦輪葉片的廢氣脈動，令每個增壓渦管都獲得均勻的峰值扭力，不過如何改良就沒有詳細解釋。其實，渦輪增壓技術在法拉利的製造傳統中佔有重要的一席，如為人熟悉的1984年GTO及1987年F40，都是汽車史上最成功的跑車之一。經過多年的發展，搭載於California T的3.9公升V8 Turbo引擎更為先進，性能及耗油表現都有長足進步，與上代California相比，燃油效率便提升高達15%。此外，California T的引擎安裝位置也降低了40mm，低重心不但可提升操控性能，高速行車的穩定性都得到同步提升。

中控台屏幕有一點反光，白天開篷駕駛會影響畫面清晰度。	車上用上大量皮革包裹，首飾箱上方還有California T的飾牌。	放大圖片
配上Turbo的California T，性能得到大幅提升。	後排足以容納兩名成年人，但只適宜中短途旅程。

4座位實用兼備

動力配置由3.9公升V8渦輪增壓引擎及七前速F1雙離合器波箱組成，最大馬力與扭力分別達到560CV及755Nm，加速力雖冇488 Spider咁狠，但仍可在短短3.6秒由靜止破百，甚至在11.2秒內突破200km/h，實力唔講得笑。原廠公布的耗油數據為10.5L/100km，冇可能咁慳？又唔一定嘅，好似玩慳油比賽咁揸咪OK囉！不過咁，揸拉利揸到咁唔揸好過啦！比起488 Spider，California T多了一個後排，實用性更強，全車不但可載4人，後排座椅還能向下摺疊與行李箱打通，裝載高爾夫球袋及滑浪板等長形物件都不成問題。要是在雞蛋裏挑骨頭，缺點總會找到的，例如在陽光普照下開篷駕駛，中控台的6.5吋屏幕會有一定程度的反光，後泊鏡傳來的畫面看來不太清晰。很大問題？肯定不是，假如開咗篷都判斷唔到車尾與周邊物件距離，下下都要靠後泊鏡，去搵師傅補補鐘吧！