Time Lapse專家親授20秒縮時賞煙花

3至4秒間隔時間

縮時攝影的原理是將影像每隔一個時間拍攝下來，常用於捕捉日出、雲海、天氣等變化，經過後製將多張相片串連成短片，便可像快鏡般重溫美景。影風景變化就話靚啫，縮時影煙花又得唔得呢？原來Francis上年已試過Time Lapse拍煙花，擺上網仲攞咗唔少Like。以今年煙花匯演歷時約23分鐘為例，由於比風景Time Lapse拍攝時間短得多，所以可將整個過程壓縮至20秒左右。Francis指出：「若然想提升影片連貫性，張張相都影到煙花爆開的話，間隔時間唔好設定得太長，如果唔係就會錯過好多精彩畫面。」他建議將間隔時間設定為3~4秒左右，至於快門速度大概2~3秒。而拍攝時會使用低感光度，光圈約F8~F10，因應畫面再調校曝光。

另備相機影靜態相

玩Time Lapse首要器材準備充足，事關唔係部部相機都影到，Francis表示：「首先必定要有支穩定嘅三腳架，萬一有少少郁咗都會前功盡廢，另外當然唔少得相機，我自己用開Canon 5DS R，建議大家帶定後備相機，一部用作拍攝Time Lapse，另一部影靜態相片。如果相機本身冇間隔拍攝功能，就要用計時器快門線來進行間隔拍攝。鏡頭方面，可選擇16~35mm或24~70mm焦段，廣角足以囊括整個煙花畫面便足夠。」

煙花睇真啲 第1幕：年年歡樂 頭8秒會在歡樂聲中大灑「金錢滿地」，然後出現「紅色8字柳邊」造型的煙花。	第4幕：星夢童話 像一棵棵愛情樹的「金閃垂楊柳」於半空綻放，並有「蝴蝶」及「蜻蜓」翩翩起舞，充滿浪漫詩意。	第8幕：欣賞香港 長達30秒無間斷放出「銀冠」、「錦冠」及「紅藍大麗錦尾」，畫面燦爛奪目，並以大禮炮壓軸。

軟件修圖及合成

影咗成晚有咁多相，最後步驟當然要後製整理。Francis強調：「用Time Lapse影約20分鐘煙花匯演，大約會影到500張相左右，不過唔係就咁剪埋一齊就可以放上網，首先會用《Adobe Lightroom》軟件，一次過執相片的光暗、對比度和減雜訊，然後以《Adobe After Effects》軟件將多張相片剪輯成一條Time Lapse短片，加入背景音樂會令視聽效果更佳。」由於影片是由相片轉換而成，解像度輕易超越4K，因此要製作2,160p的4K影片放上YouTube其實難度唔高。

Francis雖然平時鍾意用路軌影Time Lapse，但由於尖沙咀海旁人流較多，故不宜出動路軌郁來郁去。	用Time Lapse影煙花的間隔時間唔好太長，設定為3至4秒已經足夠。	在YouTube搜尋「4K UHD Chinese New Year Fireworks」，可搵到Francis所拍的Time Lapse煙花影片，數十秒便可以睇晒整晚煙花片段。
Francis用緊Canon 5DS R單反相機，備有5,060萬像素畫質。售價：$27,480（淨機身）（a）	玩Time Lapse最重要帶備三腳架，Gitzo Traveler系列勝在穩陣又輕便。售價：$7,680~$9,280（三腳架連雲台套裝）（b）	後製軟件 以《Adobe Lightroom》軟件將幾百張相一次過執光暗、對比度和減雜訊。
《Adobe After Effects》軟件可把影像合成做Time Lapse影片，過程簡便，新手適用。	港島拍攝靚位 金紫荊廣場 港島區有唔少地方可影煙花，首選當然是灣仔金紫荊廣場，皆因對正煙花發放位置，唯獨比起尖沙咀構圖冇咁靚。	畢拿山 雖然太平山的地理位置優越，但能夠影到靚相的位置實在太少，所以Francis建議去畢拿山，能夠從高處俯瞰煙花，並有高樓大廈襯托。

Francis小檔案

以縮時攝影而聞名的Francis，曾與Canon及香港天文台合作，分享縮時攝影技巧，當中作品《Seen by My Eyes, Hong Kong》曾獲得葡萄牙影展4個國際獎項，及於洛杉磯獨立電影節2015獲得最佳縮時影片，亦分別被多個品牌選為4K電視的演示影片。

撰文：黎子豪

部分攝影：陳富權

模特兒：Bowie（Reborn Production）

查詢電話：（a）3191 2333、（b）2327 6728