BEBOP 2 25分鐘長氣續航

航拍嘅門檻愈來愈低，全因無人機售價趨向大眾化之餘，操控亦變得User Friendly，好似Parrot全新Bebop 2四軸無人機專攻入門玩家，藉着輕巧機身及大電池令續航力延長至25分鐘，今次一於請航拍高手Henky講吓新機有幾好玩。

Bebop 2利用Wi-Fi連接手機或平板操控，兼容iOS及Android系統。

電量大幅提升

無人機嘅死穴向來係飛得唔夠耐，一般玩幾分鐘至十幾分鐘就要回航換電，Bebop 2完全唔同，配備2,700mAh專用電池，能夠不停飛近25分鐘，續航力比起上代足足長逾一倍。玩咗航拍多年嘅Henky指出：「飛得耐其實對拍片質素影響不大，之但係唔使成日換電，確實方便好多，尤其是能讓新手熟習操控及培養興趣。」值得一提，新機的電池唔似上代用魔術貼綁緊，只要啪落機身即可插實，而且機尾加入指示燈，飛上天時會眨吓眨吓，畀各位一眼睇到機身方向。

500g便攜機身

以玻璃纖維打造嘅Bebop 2，機身重量僅500g，加上四軸螺旋槳可以拆除，方便帶出街四圍玩，Henky表示：「雖然細機冇大機咁穩定，但衝力相對較小，萬一操控失誤墮下或撞到物件，對機身嘅傷害都冇咁大，所以新手最啱以這類輕巧嘅機款練習。」拍攝方面，它配備了一支魚眼鏡頭，可拍到1,080p影片及1,400萬像素相片，更內置數碼三軸防震系統，令影片清晰穩定。不過機身只內置8GB記憶體，要長時間記錄全高清影片似乎唔係好夠用。

$4,388（淨機）、$6,388（連Skycontroller黑色版套裝）	尾部新增紅色指示燈，飛上天時會眨吓眨吓，以便分辨前後方向。	配備數碼三軸防震系統的魚眼鏡頭，能拍攝1,080p影片。
機底備有超聲波感應器和垂直穩定鏡頭，每16毫秒便會擷取影像，用作確定飛行速度。	附有4支後備螺旋槳，一旦有損耗可即時替換。	用上全新2,700mAh電池，可以玩到約25分鐘。

2公里接收範圍

一如其他Parrot機款，它同樣備有兩種操控方法，並以Wi-Fi作配對，其一係用手機或者平板經《FreeFlight 3》App操作，App內可調校飛行速度、高度距離、機身傾斜度等，還有一鍵起飛/降落和自動返航等實用功能，新手就唔怕升降時炒機。另一種係用套裝附有嘅Skycontroller遙控器，備有大型天線將Wi-Fi信號擴展至2公里咁遠，並可夾上手機或平板瀏覽FPV畫面。Henky解釋：「若果玩家本身有平板，玩航拍嘅成本會較低，但用平板操作時影像會有少少Delay，所以建議新手最好用遙控器操作，實試甚少出現Delay情況。」