道後溫泉做花癡

四國愛媛縣的道後溫泉,聲稱開湯3千年,為日本三大古湯之一。走開平實古樸路線的道後溫泉,今年竟然出軌玩過界,聯同日本鼎鼎大名的攝影師兼導演蜷川實花合作,將溫泉的商店街、電車、餐廳等打造成花花宇宙,鮮艷程度相信連外太空上的衞星都睇到,仲有主題房同浴衣試着,不如你跟我一樣,扮到成隻金絲雀咁去朝聖吓!

花姐之展 古樸變鮮花

多得道後溫泉同蜷川實花的聯乘限定主題展,百年溫泉都只能當大布景。為期10個月的展覽名為「蜷川實花×道後溫泉Dogo Art 2015」。蜷川實花的作品一向「人如其名」,花天花地花海不在話下,顏色鮮艷至極點,來到道後溫泉,繼續不遺餘力用盡調色盤上的顏色。以為花姐的作品會淹沒溫泉區?錯了,日本人豈會求其放張特大花花照片就了事?走入道後溫泉街,發覺沒有異樣,原來「花兒」真的會怕醜,躲起來同你玩捉迷藏,要你仔細看才找到。第一朵野生捕獲的花在溫泉本館正門,鮮花浴簾將3層的木造建築低調地添上色彩。再轉個頭走多兩步,看到本館2及3樓的紙門上有場迷離又夢幻的光影Show。抬頭看看溫泉商店街門頂,發現提燈閘門的燈籠花花陣甚為耀眼,原來是花姐親自提議的裝飾。

去到其中一間酒店Prince Hotel,內裏的主題客房「Tsubaki」(意即日本山茶花)才是震撼之作,由天花、紙門、牆身、床鋪、枕頭袋等,都是大紅樁花,不戴黑超的話必定被「鮮花子彈」射死!

蜷川實花 X 道後溫泉Dogo Art 2015

網址:http://dogo-art.com

日期:即日至2016年2月29日

道後溫泉

地址:愛媛縣松山市道後湯之町5-6

網址:www.dogo.or.jp

交通:於松山觀光港乘坐巴士約40分鐘至道後溫泉

浴衣裝身 願似花嬌美

雖然道後溫泉區的古湧園旅館不設花姐主題房,但就有蜷川實花設計的浴衣,女士們聽到即刻心心眼,冇咗個橙都算叫執番個桔!皆因花姐平時只會為日本紅星如土屋

安娜、水原希子、澤尻英龍華等做形象設計,着靚衫幾時輪到我等小女子?今次難得可以一試花姐親手設計的兩款浴衣,分別為彩色菊花及粉紅茶花,再配上藍色及桃色腰帶,靚到呢!不試穿對不起自己呀!旅館大堂擺放了浴衣Dummy公仔,好明顯係用來吸引一眾女士破財。樓高9層的古湧園,在道後溫泉區來說規模算是甚大,餐廳、居酒屋、手信店等樣樣有,最特別之處是晚上吃會席料理期間有藝伎表演,加埋配樂手,這個意想不到的小表演還不錯。晚餐是豐富的瀨戶內海料理,刺身、火鍋、炸物都以魚為主,鮮味無比。雖然蜷川實花的花花世界溫泉區聯乘活動到出年2月尾就完,但浴衣就到出年8月31號都仲有得借着,下年暑假都仲趕到水尾呀。

古湧園

地址:愛媛縣松山市道後鷺谷町1-1

房價:雙人房每晚¥15,120(約HK$953)起

網址:www.kowakuen.com

交通:於松山觀光港乘坐巴士約40分鐘至道後溫泉,再步行約5分鐘

TRAVEL NOTES

簽證:持有效特區護照或BNO均毋須簽證

機票:香港來回廣島經濟客位約HK$2,572起

交通:由廣島港出發至愛媛縣松山觀光港,乘坐瀨戶內海汽船約2小時40分鐘,價錢為¥3,600(約HK$230)

貨幣:¥100約兌HK$6.4

天氣:11月氣溫約8℃~17℃

特派記者:龔思敏

鳴謝:點滴是生命、四國觀光推進機構