NBA開鑼籃神武器Match Up
新一季NBA剛開鑼，睇見Curry神射三分、Westbrook飛身剷籃、Griffin「拆你屋」，各位嘅籃球火係咪經已燃起呢？想操到好似佢哋咁Fit，做「籃」神橫掃街場，必須要有秘密武器。今次小記搵咗一系列外國勁Hit嘅NBA級訓練裝備，仲請嚟甲一球星潘志豪和蔡芳裕測試，想知裝備堅係實用定純粹Gimmick？即睇！
秘密武器1：Dribblepro 窩釘控球
由前球星Mike Bibby老竇Henry Bibby研發嘅Dribblepro，睇落同細版「膠波」冇乜分別，但細心留意會發現波嘅表面加設4個類似窩釘嘅凸角，當運球拍波時，Dribblepro會無定向四圍彈走。控衞出身嘅潘志豪，初試時都嚇一跳兼甩晒手，大呼個波嘅移動軌迹「唔正路」。
「個波非常難控制，因為會不規則彈左彈右，要運球有啲難度，一定要重心夠低；但好處係可模擬『甩手』等情況，可以訓練控波反應。」
秘密武器2：Hoop Shooter Pro 神射護腕
遠睇以為球員帶住手銬射波，其實Hoop Shooter Pro由兩組護腕加上磁石桿組成。球員只需戴於手腕便可訓練射波，目的係局限球員嘅動作，加強射波Muscle Memory。射波姿勢正確嘅話，護腕磁石桿係唔會甩開，當甩開咗就代表動作錯咗！潘志豪讚磁石桿嘅磁力適中，唔怕箍得太緊整傷手腕。「佢可以固定射波動作，啱晒初學者練Shooting；而且方便攜帶，一個人練射波時啱用。」
秘密武器3：Hoop Harness 單手上籃
黑色尼龍物料製造的Hoop Harness，極受外國球員歡迎。它主要分為大小圈兩部分，先將大圈好似皮帶咁扣喺腰部，再將細圈戴喺手腕，咁球員就要逼住用單手拍波和走籃；最正係包裝封面有Mr. Crossover之稱嘅前球星Tim Hardaway簽名，頓覺充滿說服力。潘志豪表示：「非慣用手控波較差，係好多球員嘅通病，Hoop Harness可以令球員唔會太過依賴單一隻手，慢慢可熟習非慣用手帶波和上籃。」
秘密武器4：Big Rock 加大籃球
小記第一眼見到Big Rock，不期然問「個籃球咁大個？」其實佢嘅Size有成36吋，比一般約30吋嘅標準籃球大好多，不過無論重量和質感都同傳統籃球接近。睇落過癮，究竟有乜實際作用？蔡芳裕指出：「個波Size大咗，射波嘅拋物線要高啲，而且要射準啲先入到籃；其次可以用嚟練習搶籃板，因為難射入又易彈出，其他球員就有更多機會搶籃板。」
秘密武器5：Strength Shoes 彈力提升
睇NBA見到班球星成日飛身入樽，作為球迷梗係想有朝一日可爆籃入樽。美國真係有廠商研發「入樽鞋」，呢款Strength Shoes已出咗好幾代，透過特製嘅前掌設計，幫球員訓練小腿力量，從而提升彈跳力。逾2米高嘅蔡芳裕試完後表示：「前腳掌墊高咗，令到訓練時可以用多啲小腿肌肉，練到爆發力和彈跳力；不過要提醒各位，一定要有專業教練指導，否則隨時受傷！」
撰文：林子聰
攝影：蔡浩文
查詢電話：9506 6478