紐約直擊！Surface Book GPU合體挑機

紐約麥迪遜廣場公園隔籬嘅James A. Farley Post Office近日人山人海，唔係排隊去寄信，而係雲集全球傳媒參與Windows 10 Devices Event！現場除了Surface Pro 4電腦、Lumia 950/950XL手機、Microsoft Band 2手環等悉數登場，最驚喜是從未曝光的Surface Book筆電大玩分體設計，鍵盤底座竟內藏GPU圖像處理器，合體即可化身成超強手提電腦，擺明向MacBook挑機！
Surface Book支援多個使用形態，用法靈活。
Surface Book支援多個使用形態，用法靈活。

Surface Book變形筆電

發布會中最令全場哄動嘅產品肯定係Surface Book，銀色金屬機身、13.5吋3,000×2,000解像度屏幕，加上Intel Core i5或i7處理器、8GB或16GB RAM，單睇規格已勁過唔少Laptop。

新機仲識得分體變形，屏幕部分可從底座拆出來充當Tablet使用；而底座除咗係一個鍵盤，仲內置NVIDIA GeForce GPU，合體後可提升圖像處理效能，無論想剪片或執相都大派用場，難怪官方稱新機為Ultimate Laptop！但想玩新機都要付出代價，不設GPU嘅入門版售價由1,499美元起（約11,692港元），想有GPU加持的話則由1,899美元（約14,812港元）起，將於10月26日開賣。

Surface Book備有Surface Pen，現場以《StaffPad》示範五線譜作曲。
  • Surface Book備有Surface Pen，現場以《StaffPad》示範五線譜作曲。
鉸位呈捲曲形狀，機身合起時屏幕同鍵盤唔會完全緊貼。
  • 鉸位呈捲曲形狀，機身合起時屏幕同鍵盤唔會完全緊貼。

Surface Pro 4板腦現身

現場一如網上傳聞，發表新一代Surface Pro 4，其屏幕升級至12.3吋2,763×1,824解像度，並支援10點觸控，而機背保留Kickstand多角度支架，厚度更由上代9.14mm縮減至8.45mm，令便攜性有所提升。招牌嘅Surface Pen觸控筆支援1,024階感壓，擦膠功能改置於筆尾，將筆倒轉即可使用擦除功能。新版Surface Pen更可透過磁力固定於機側，一改以往要另購筆套嘅麻煩。新機將提供多個版本，處理器由Intel Core m3、i5至i7，記憶體則有4GB、8GB、16GB，容量有128GB至1TB選擇，售價由899美元起（約7,012港元），最頂級型號要賣2,699美元（約21,052港元），預計10月26日正式開賣。

銀色機身的Surface Pro 4備有多色Type Cover供選購。
  • 銀色機身的Surface Pro 4備有多色Type Cover供選購。
機背備有Kickstand，方便調校不同擺放角度。
  • 機背備有Kickstand，方便調校不同擺放角度。

Lumia 950/950XL靚芒雙雄

《Windows 10》系統推出咗一段時間，唔少大廠都乘勢推出新一代Gadgets，偏偏Microsoft遲遲未有動向。今次就喺紐約發布旗艦手機Lumia 950及950XL，兩機均用上聚碳酸酯背殼、2,000萬像素蔡司鏡頭、3 LED閃光燈、USB-C插口等。最大分別是屏幕尺寸及處理器，Lumia 950用上5.2吋芒及Qualcomm Snapdragon 808六核心處理器，而Lumia 950XL用上更大嘅5.7吋芒，配以效能更強嘅Qualcomm Snapdragon 810八核心處理器。

Lumia 950（左）及950XL（右）設計相若，分別用上5.2吋及5.7吋芒。
  • Lumia 950（左）及950XL（右）設計相若，分別用上5.2吋及5.7吋芒。
兩機均搭載2,000萬像素蔡司鏡頭，拍攝質素不俗。
  • 兩機均搭載2,000萬像素蔡司鏡頭，拍攝質素不俗。
改用USB-C插口，支援快速充電，30分鐘可將電量回復至50%。
  • 改用USB-C插口，支援快速充電，30分鐘可將電量回復至50%。
內置Rich Capture功能，因應用家影嘅靚相提供不同後製效果。
  • 內置Rich Capture功能，因應用家影嘅靚相提供不同後製效果。

值得一讚係廠方將屏幕升級至2,560×1,400解像度，令顯示更細緻。新機賣點當然係《Windows 10》系統，內裏包括Cortana語音助手、Office文書工具、Microsoft Edge瀏覽器、Glance Screen資訊顯示、Windows Hello辨識解鎖等功能，相信用開Windows嘅各位不難適應。定價方面，Lumia 950及950XL分別售549美元（約4,282港元）及649美元（約5,062港元），將於11月開賣。

Display Dock手機變電腦

雖然手機愈出愈強，但受操作介面所限，文書、上網等應用始終都係電腦用得舒服啲，Display Dock為此而生，其機身備有HDMI及DisplayPort插口，只要將它連接至電腦屏幕或電視，再透過USB插口接駁滑鼠、鍵盤、外置硬碟等周邊配件，最後將指定型號手機經USB-C連接Display Dock就搞掂，毋須任何設定便可將手機化身成電腦。屏幕所顯示嘅介面會自動變作PC版嘅《Windows 10》，可以似足PC咁上網、編輯Office文件。而且手機屏幕和電腦屏幕可各自操控不同Apps，即是手機覆電郵時，電腦屏幕可繼續做PowerPoint，以後一個Display Dock便可取代屋企部電腦。

Display Dock接駁方法簡單，隨時將手機變成電腦。
  • Display Dock接駁方法簡單，隨時將手機變成電腦。
Display Dock以金屬打造，重量為230g。推出日期及售價：待定
  • Display Dock以金屬打造，重量為230g。推出日期及售價：待定

同場加映：Microsoft Band 2弧芒手帶

Microsoft 新一代智能手帶玩弧芒及換上Corning Gorilla Glass 3強化玻璃，令表面更耐用。最特別是內置11個感應器，可量度心跳、氣壓、UV、皮膚溫度及GPS定位，可以話係現時功能最齊嘅智能手帶。另可配合手機App查閱相關數據。

為咗示範Microsoft Band 2功能，現場擺放單車量度心跳等數據。
  • 為咗示範Microsoft Band 2功能，現場擺放單車量度心跳等數據。
Microsoft Band 2定價249美元（約1,942港元），預計10月30日開賣。
  • Microsoft Band 2定價249美元（約1,942港元），預計10月30日開賣。
現場以全息影像頭戴裝置HoloLens（圓圖）玩《Project X-Ray》遊戲，極之刺激。
  • 現場以全息影像頭戴裝置HoloLens（圓圖）玩《Project X-Ray》遊戲，極之刺激。
在場最多人玩嘅係Surface Book，皆因發布前連網上都冇人提起過。
  • 在場最多人玩嘅係Surface Book，皆因發布前連網上都冇人提起過。
發布會位於Skylight at Moynihan Station，其實喺James A. Farley Post Office入面。
  • 發布會位於Skylight at Moynihan Station，其實喺James A. Farley Post Office入面。
作為Microsoft 年度活動，其CEO Satya Nadella自然到場力撐。
  • 作為Microsoft 年度活動，其CEO Satya Nadella自然到場力撐。

特派記者：林子聰

鳴謝：Microsoft