GX8雙料防震　定過石膏手

近期唔少新無反相機都Sell防震，其實諗諗吓都好合理，皆因帶得細細部嘅無反出街，十個有九個都手持Snapshot，冇乜幾個會腳架隨身，所以Panasonic全新LUMIX GX8無反相機，特別引入雙影像防震系統，機身同鏡頭一齊減震，就算影友冇「石膏手」都一樣定過人。

售價：$10,390（淨機身）、$14,290（連14~140mm單鏡套裝）

機身加鏡頭防震

GX8首次在M4/3無反系列引入雙影像防震系統（Dual I.S.），令影相過程同時盡享機身的四軸防震和鏡頭的二軸防震，加埋咪好似有六軸防震咁穩定，難怪發布會當日，廠方將佢同其他品牌的五軸防震機款比較，結果的確係GX8定好多，啱晒用家手持拍攝室內環境或夜景。不過唔係支支O.I.S.鏡頭都兼容得到，廠方表示現時雙重防震只對應到6支鏡頭，要待韌體更新後，大概至明年初便會絕大部分鏡頭都用到。

4K拍片兼影相

現時影友不僅追求靚相，更要兼顧埋拍片先至合格，為此新機用上2,030萬像素感光元件，配合四核運算的Venus Engine，支援最高4K@25fps拍片畫質，比起全高清影片仲要細緻。此外，新機引入4K照片功能，能以每秒30格高速連拍800萬像素的4K相片，並提供4K連拍、4K連拍（S/S）及4K快門前連拍3種模式，前者像B快門般按實快門拍攝，4K連拍（S/S）則是按一下快門作開始和結束，而4K快門前連拍會自動記錄按快門前後共約60張影像，以便捕捉動態主體。

GX8備有銀黑和全黑兩種機身顏色選擇。

發布會展出GX8的內構，讓各位了解雙影像防震系統的原理。

GX8於震動的枱面連接電視輸出影像，畫面依然穩定清晰，防震功能出眾。

上翻式觀景器

外形方面，新機配備0.77倍放大率的236萬像素電子觀景器，能夠向上翻90度，方便用家以不同角度取景，而背面用上3吋側揭式屏幕，支援觸控功能作篤芒拍攝和操作。另一特別之處是機頂設有雙層轉盤，上層為模式轉盤，下層則是曝光補償轉盤，另提供前後兩個操作轉盤，完全屬高階配置，加上手柄經過加厚，並植入NFC無線連接功能，手感更佳。

3吋側揭式屏幕支援觸控功能，畀你篤芒拍攝和睇相。	背面的按鍵雖多，但布局清晰，全機更設有13個虛擬加實體自訂鍵。	新機不設內置閃光燈，備有Hotshoe插座作擴充之用。
用上2,030萬像素Live MOS及Venus Engine四核影像處理引擎。	頂部設有前後操作轉盤，並結合模式轉盤和曝光補償轉盤設計。	機身防震可揀全方位修正，或者用作Pan鏡的上下修正。
試相區：於室內環境抓拍，有賴新防震系統加持，令相片穩定清晰，而且影像色彩鮮明，令花卉看起來更有生氣。