深海Fishing 日出釣大魚

唔少人覺得釣魚係一樣沉悶嘅嗜好，但發燒友卻認為它既刺激又過癮，除了可細分為投釣、磯釣、台釣等不同玩法，魚獲上來一刻仲好似抽獎咁驚喜，當中最富挑戰性莫過於深海船釣，事關喺深海隨時會釣到高過人、重幾十公斤以上嘅巨魚。今次一於請魚濃社店主Ricky和釣魚達人阿寶，分享深海船釣有幾好玩。

深海魚種類多

深海船釣即乘坐快艇或大船，到深海位置以魚竿垂釣，香港發燒友大多會南下至公海，坐快艇約3~5個鐘就到，Ricky表示：「之所以去到咁遠釣魚，皆因深海魚的物種豐富，例如有機會釣到大GT（Giant Trevally）、鱆紅魚、七帶斑等，呢啲都喺內港比較少見，加上深海水質較佳，魚嘅Size會比較大。」阿寶補充：「有次釣到條63公斤嘅鱆紅魚，足足有1.8米咁長，高過唔少人，釣上嚟嗰刻好似中咗獎咁開心，因為呢啲機會唔係成日有。」

黎明時分易上釣

基本上深海船釣都會過夜，大多玩兩日一夜（快艇）或三日兩夜（大船），而出發前4天要不斷留意天氣預告，一來如果天氣唔好易生意外，二來低氣壓魚亦唔會開口，有機會取消行程。Ricky和阿寶指出：「除了留意天氣，亦要注意水流，農曆廿八至初六、十三至廿一俗稱生流，即是水嘅流量大、流速高，令水帶氧量高，魚就自然較為活躍和食欲高漲。唔一定要放長線先釣到大魚，其實夾啱時間一樣可以！晚黃（即黃昏時分）及爆光（即黎明時分）呢兩個時間，魚嘅警覺性較低，而且好多大魚都係爆光先食嘢，由於時間好短，所以要好好把握。」

深海船釣唔似磯釣，事關大海就喺腳下，唔使拋竿動作。

船釣閒閒哋每人兩三支釣竿隨身，擺在一起相當有氣勢。

魚濃社店主Ricky（左）和釣魚達人阿寶（右），二人均擁有逾20年釣魚經驗。

包船「重裝」出擊

其實釣魚可以玩得好專，單係裝備已經五花八門，以針對不同地域和魚類使用。由於深海魚嘅Size較大，故深海船釣需要配備「重裝」，先至夠力拉幾十公斤以上嘅魚上嚟。「船釣專用竿包括Set喺船上嘅船竿或Jiggin竿，兩者玩法好唔同，所以兩種都會帶晒；絞方面亦有直絞、橫絞和電絞，當中電絞主要針對深海船釣用，可以節省上魚氣力；仲有　　幼身且拉力大嘅PE主線、10両至3斤嘅重鉛等。魚餌則會揀生魷魚、生魚仔、蝦仁等，前者比較常用。」

電絞擁有「超拉力」設計，能夠幫你慳力，有啲仲內置深度計，售價由二千至三萬元不等。	船釣專用Jiggin竿，雖然硬度不高，但回彈力十足，售價大約幾百至萬幾蚊都有。	橫絞（左）和直絞（右）的分別在於手勢不同，不過橫絞上魚較為慳力，但速度慢；至於直絞勝在速度快，但需要付出較多力氣，售價由幾百至一萬元。
釣到魚後第一時間用魚網網住，以防魚獲逃脫。	釣上嚟嘅魚會先放血，然後擺落冰箱冷藏處理。	夾魚器用作夾實魚嘴，方便拍攝時拿着戰利品。
阿寶有次釣到條63公斤鱆紅魚，真係高過人！