的骰GoPro4大貼身玩法

潛入10米水深

Hero4 Session絕對可以用的骰來形容，事關四方外形似足一粒骰仔，最重要係本身擁有防水效能，唔加殼都能深潛10米，啱晒鍾意玩水嘅拍友，加上電池續航力特強，能夠連續使用兩個鐘，夏天帶去衝浪就啱晒。附送的四方形外框安裝容易，以便快速調整拍攝角度，機身還支援影像自動旋轉功能，就算大頭蝦上下倒轉咗安裝，都識得自動調整至正常拍攝角度。

第一身視點篤波

唔少人玩Action Cam都係裝上身，拍出第一身視角畫面，估唔到新機可以夾埋喺Cue棍，攝錄篤波角度和桌球軌迹。假如追求高畫質的話，Hero4 Session提供最高1,440@30fps質素，比全高清規格更精細。若然講求流暢感，唔想窒格的話，都有1,080@60fps或720p@100fps畀你揀，呢兩種畫質仲提供SuperView模式，其超廣角視野效果拍出來更Wide。想玩第一身視點仲可以裝喺單車、頭盔、樂器等地方，效果與眾不同。

機身備有拍攝鍵和開關掣，以及液晶屏幕顯示資訊。	設有microSD卡槽及microUSB插口，具有防水軟膠保護。	由於新機不設屏幕取景，要用Wi-Fi與手機配對後先知道影緊乜嘢。

手機遙控玩自拍

新機不僅拍片勁，影相一樣掂，可影到800萬像素相片，連拍速度可以去到10fps，甚至玩埋Time Lapse都冇問題，一部機有多種玩法。由於機身大幅收身，所以按鍵隨之減少，全機只有開關掣和拍攝鍵，加上沒有取景屏幕，只保留細小的液晶屏幕顯示基本資訊，令操作更簡易。若果玩自拍時想睇吓自己影緊乜嘢，可透過Wi-Fi及藍芽跟手機配對，再以《GoPro》App遙控拍攝，仲可經手機調校設定。

手持自拍 Hero4 Session重量比其他GoPro機款輕近四成，長時間手持自拍都唔怕手軟。	貼身篤波 GoPro主打第一身視點，估唔到可夾喺Cue棍上貼身篤波，取景角度過癮。	自拍演奏 唔少音樂人會自拍演奏情況，新機可夾於色士風等樂器。
潛水拍攝 新機最大賣點係防水性能，毋須加殼便可直接掟入魚缸拍片。	玩水時唔想部機石沉大海，可另購Floaty配件令機身浮水。售價：$230	試片區 模特兒一邊自拍一邊自轉，可見背景緩緩變動，而主體夠實淨，畫質相當不俗。

同場加映：3DR航拍機

除了GoPro Hero4 Session外，代理同場展出了3DR航拍機，雖然呢部機唔係GoPro出品，但可加裝Action Cam作航拍之用，更植入三軸防震雲台，預計8月面世。

撰文：黎子豪

攝影：林資凱

查詢電話：2950 0175