假如你做過朋友間的活動搞手，應該會覺得以下的對話似曾相識。「不如食泰國菜吖？」回應：「唔好啦，有人唔食辣。」「食日本嘢好唔好？」回應：「有人唔食生嘢喎！」「咁去食Buffet啦！」回應：「幾百蚊一位，好貴啫！」快將失去耐性的你，不妨單刀直入：「一於去銅鑼灣食燒烤放題，我即刻訂位。」只要徹底忽略「放題專供應Cheap嘢」、「攝氏30幾度食燒烤會熱死」等意見，這趟「一意孤行」的飯局應該會為所有朋友帶來驚喜。

天時暑熱去燒嘢食，簡直是耐力大挑戰，然而諗深一層，銅鑼灣又怎會有燒烤場？邊個話冇？只是最近開張的「火山燒」主打的是岩燒石串燒罷了。所謂岩燒石，亦即是火山岩漿冷卻後所形成的岩石，不少專業廚房都以此烤肉，好處是石頭受熱均勻，能保持攝氏370度高溫，釋放的遠紅外線能減慢散熱速度並鎖住肉汁，食物不易燒焦自然加倍美味及健康。如此專程從富士山訂購原石，並以特製烤爐代替傳統炭燒或鐵板燒供客人親製串燒，在香港則可謂絕無僅有。

開大冷氣歎串燒自然不會惹來投訴，但一班挑剔的朋友聽到「放題」兩個字可能又會嫌Cheap，誰叫許多專營放題的餐廳都以平價作招徠，將貨就價其實也是人之常情。結果翻開「火山燒」的柯打紙又有驚喜，任點任食的食物主要分為宮崎牛、豚肉、土佐雞、水產、野菜、別類6大類別，種類多達60款，每位另加$20則可任飲汽水果汁。選擇多元化固然吸引，但放題居然會有宮崎牛肩肉、黑豚腩片、土佐雛雞等日本進口美食，又有生蠔、秋刀魚、鯖花魚、三文魚頭等供應，多個時段任食2小時每位只需$196至$280。

想食得更加講究，餐廳也有散點的時令海產給客人選擇。為了證明海鮮都是生猛貨色，樓下那層就設有魚池養殖鮑魚、龍蝦、毛蟹等活海產，以為即叫即食會畀人劏到一頸血？價錢卻很公道，好像6頭活鮑魚每隻僅售$48、1.2磅重的波士頓龍蝦只賣$128、北海道毛蟹每隻$158，一班朋友開心Share也很划算。擔心燒海鮮時會失手影響味道與賣相，不妨交由餐廳代勞，至於其他串燒則毋須假手於人，只需按個人口味用黑椒、海鹽或七味粉調味，再蘸點酸辣汁、玫瑰蜜糖或日式照燒汁3款風味醬料便滋味無窮。

環境氣氛：3★（以5★為滿分）

好味指數：3★

必試推介：宮崎牛肩肉、黑豚腩片、土佐雛雞

人均消費：$300

撰文：楊雅菁

攝影：林資凱

地址：銅鑼灣駱克道459~461號The L. Square 9至10樓

查詢電話：2889 7008